Aqtóbede bankrot bolǵan zaýyttyń jumysshylaryna jalaqynyń qashan beriletini anyqtaldy
Aqtóbelik jumysshylar birneshe jyl boıy zaýyttyń qaıta jańǵyryp, jumys isteıtinine sendi. Degenmen talshyqty plastıkalyq qubyrlar shyǵaratyn zaýyt alǵashynda Reseı, Ózbekstanǵa óz ónimin tasymaldaǵanymen, keıin suranys bolmaǵan.
«Aqtóbe beımetall qubyrlar zaýyty jumysshylaryna 63 mıllıon teńge qaryz. Qazirgi ýaqytta zaýyttyń bar múlki baǵalanyp, satylymǵa shyǵaryldy. Alǵashqy quny 1 mıllıard 400 mıllıon teńge. Birinshi satýǵa shyǵarylǵan kezde zaýytty eshkim almady. Zańǵa sáıkes zaýyt quny 20 paıyzǵa arzandatylyp, qaıta satylady. Sol kezde aldymen jumysshylardyń eńbekaqysy tólenedi», - dedi Aqtóbe oblysy ákiminiń orynbasary Qaırat Bekenov.
Qazirgi ýaqytta 100-den astam adam jalaqysyn ala almaı júr. Olardyń keıbiri sol kompanııadan zeınetke shyqqan.
«Birneshe ret jumysshylarmen kezdesý ótti. Zaýyt 2018 jyldyń aqpan aıynda sot sheshimimen bankrot boldy. Qazirgi ýaqytta boryshty óteý úshin satylymǵa shyǵaryldy», - dedi Aqtóbe oblystyq eńbek ınspektsııasy basqarmasy basshysynyń orynbasary Baýyrjan Orazaev.
Jumysshylardyń keıbiri 500 myń teńge, keıbiri 1,5 mıllıon teńge bolatyn jalaqysyn almaǵan. Sonymen qatar kompanııa kúzet qyzmetin kórsetken ujymǵa 10 mıllıon teńge bereshek.
«Jumysshylardyń árqaısysy bir otbasynyń azamaty. Keıbiri nesıe alyp, qaryzǵa batqan. Sondyqtan osy máseleni sheship berý úshin kómek surap otyrmyz»,- dedi burynǵy jumysshy Oralbaı Elýbaıuly.