Aqtóbede balasyn mektepke jibermegen ata-analar aıyppul tólep jatyr
Aqtóbede balasyn eki toqsan boıy sabaqqa jibermeı otyrǵan ata-analar bar. Olar qyzdarynyń oramal sheship júrýine qarsy. Al bul Bilim jáne ǵylym mınıstrliginiń mektep formasyna qatysty buıryǵyna qaıshy keledi. Sondyqtan Aqtóbe oblystyq bilim salasyn baqylaý departamenti balalaryn sabaqqa jibermegen ata-analardy ákimshilik jaýapkershilikke tartyp jatyr.
«Mektep dırektory bilim basqarmasyna, bilim basqarmasy baqylaý departamentine hat túsiredi. Biz mektepke kelmeı júrgen oqýshylardyń ata-analaryn ákimshilik jaýapkershilikke tartamyz. Qazirgi kezde Aqtóbe qalasy, Hromtaý, Shalqar, Alǵa, Qarǵaly, Qobda aýdandarynyń ata-analaryna 5 AEK aıyppul salyndy. Aıyppul tólegen soń bes oqýshynyń ata-anasy balasyn mektep formasymen sabaqqa jiberdi», - dedi Aqtóbe oblystyq bilim salasyn baqylaý departamenti basshysynyń mindetin atqarýshy Janat Muhambetalına.
Aıta keteıik, Aqtóbe oblysy boıynsha bıyl 340 oqýshy oramal taqty. Olardyń basym bólimi mektep formasyn saqtaýǵa kelisim berip, oqýyn jalǵastyrdy. Qazir 72 oqýshy sabaqqa barmaı júr. Keıbiri eki toqsan boıy bilim almaǵan.
«Mektepke 10 kúnnen artyq kelmeıtin bolsa tıisti shara qoldanylýy kerek. Al bizde eki toqsan boıy kelmegen oqýshylar bar. Mınıstrlikke hat jazyldy. Balalar mektepke kelmegendikten tolyq bilim ala almaı otyr. Eki toqsan boıy bilim almasa, zań negizinde olar klastan klasqa kóshirilmeıdi. Olardyń keıbiri bilim berý ortalyqtaryna baryp, tálim alyp júrgenin bilemiz. Biraq ol jerdegi baǵa mektep jýrnalyna túspeıdi. ıAǵnı, bul tyǵyryqtan shyǵar jol emes», - dedi Aqtóbe oblystyq bilim basqarmasynyń basshysy Lázzat Orazbaeva.