Aqtóbede balalardy shirkeýge zańsyz shaqyrǵandar aıyppul tóledi

AQTÓBE. QazAqparat -Aqtóbede balalardy zańsyz shirkeýge shaqyryp, kitap taratqan birlestik basshysyna aıyppul salyndy. Mektep basshylyǵy dinı joralǵyǵa shaqyrǵandar týraly aıtyp, oblystyq din isteri basqarmasynan kómek suraǵan, dep habarlaıdy QazAqparat tilshisi.

Aqtóbe qalasyndaǵy №1 orta mektep basshylyǵy oblystyq din isteri basqarmasynan kómek suraǵan. Sebebi, mektepte bilim alyp júrgen 10-11 jastaǵy oqýshylar ata-anasynan ruqsat suramaı, jasyryn shirkeýge barǵan. Іs materıalyn qaraǵan basqarma ınspektorlary «Rojdestvo merekesine barǵan balalar dinı joralǵy ótetitin bilmegen» dep qorytyndy shyǵardy. Tipti olar lagerge syılyq alamyz degen oımen barǵan.

Tekserý nátıjesinde balalar dinı sharaǵa qatysyp, olarǵa ádebıetter taratylǵany anyqtaldy.

«Balalar birneshe ret shirkeýge barǵan. Bul jaıttan oqýshylardyń ata-analary beıhabar. Rojdestvo merekesinen soń balalardyń biri astan ýlanyp, bári sol kezde anyqtaldy. Ata-analar ózderiniń dinı kózqarasyna jat birlestikke baryp júrgen balalarynyń isine, olardy shaqyrǵan shirkeýge narazylyqtaryn bildirdi. Sondyqtan Ákimshilik quqyqbuzýshylyq kodeksi boıynsha jaýapqa tartyldy. Zań boıynsha kámelet jasqa tolmaǵan balanyń ata-anasy, zańdy ókili qarsy bolsa, ony dinı joralǵyǵa qatystyrýǵa bolmaıdy»,- dep habarlady oblystyq din isteri basqarmasynyń ınspektory Arsen Hasen.

Aıta keteıik, oblystyq din isteri basqarmasy ákimshilik quqyqbuzýshylyq hattamasyn toltyryp, is sotqa jiberildi. Aqtóbe qalalyq mamandandyrylǵan ákimshilik soty dinı birlestik basshylyǵyn jaýapqa tartyp, 120 myń teńgeden astam aıyppul saldy. Іs qaıta qaralǵanymen, sheshim ózgerissiz qaldy.