Aqtóbede balalardyń emine aqsha jınap, ózine jumsaǵan qor dırektory sotta jaýap beredi
Aqtóbe qalasynyń № 2 sotyna «MoreLife» qoǵamdyq qorynyń dırektorynyń dırektory Bıbigúl Jýlınaǵa qatysty is tústi. Іs Qylmystyq kodekestiń «Alaıaqtyq» baby boıynsha qozǵalyp, qaralyp jatyr.
Barlyǵy 7 jábirlenýshiniń shyǵyny 43 mln teńge dep esepteldi. Іs materıalyna súıensek, Bıbigúl Jýlına «MoreLife» qoǵamdyq qoryn qurady.
Keıin naýqas balalardy anyqtap, olardyń ata-analarymen kelisimge keledi. Bul isti 2022 jyly bastaǵan.
— 2023 jyly Jýlına alaıaqtyq jasaý oımen Mıllerler otbasymen tanysady. 2021 jyly týǵan balada júrek aýrýy anyqtalǵan. Oǵan da Túrkııada em qabyldaýǵa aqsha jınaýǵa kelisedi. Bul kezde de Jýlına Mıllerler otbasynyń quqyqtyq saýatsyzdyǵyn paıdalanyp, áleýmettik jeli arqyly aqsha jınaı bastaıdy. Adamdardyń senimine kirý úshin I.Mıllerdiń aty-jóni kórsetilgen esepshotty kórsetedi. Olar óz kezeginde kún saıyn aqshany qorǵa aýdarýǵa ýaǵdalasady. Jınalǵan qarjy — 3 253 208 tg. Ol aqsha tolyq jınalmasa da qoǵamdyq qor atynan Túrkııaǵa emge jiberýge kelisken. Mıllerlerdi sendirý úshin nasqasty Astana qalasyna jiberedi. Onda júrekke ota jasaý úshin beriletin kvotadan bas tartý ótinishin jazý kerek dep sendirdi. Aıyptalýshy Mıllerdiń Túrkııaǵa bara almaıtynyn, balanyń jol kótermeıtinin aıtyp, Túrkııa eliniń dárigerleri Aqtóbege kelip, ota jasaıdy dep sendiredi. Al jınalǵan qarjyny qajetine jumsady, — dedi sotta memlekettik aıyptaýshy.
Sotqa jábirlenýshiler de qatysty. Olar shyǵyndy ótep berýdi surap otyr.
— Osy týraly aıtyp, barǵanda birden is qozǵalmady. Qaıta-qaıta shaǵym túsirip, osy kúnge jettik. Búgingi kúni aqsha qaıtarylǵan joq. Tergeý kezinde jınalǵan qarajattyń esepshotta joq ekeni bildik. Jábirlenýshi aqshanyń qaıtarylǵanyn, aıyptalýshynyń jazalanǵanyn talap etedi, — dedi jábirlenýshiniń qorǵaýshysy Ásem Aıdarbaeva.
Aıta keteıik, «MoreLife» qorynyń dırektory bıyl kóktemde ustalyp, qamaldy. Ol sotta úıqamaqqa jiberýdi surady.
Eske salsaq, sotta stýdent ólimine qatysty is te qaralyp jatyr.