Aqtóbede balalar men jasóspirimderge arnalǵan basseınniń jóndeý jumysy uzaqqa sozylyp ketti

<p>AQTÓBE. KAZINFORM &ndash; Aqtóbede balalar men jasóspirimderge arnalǵan memlekettik basseınderdiń biri súrildi, endi birinde jóndeý júrip jatyr. Al úshinshisindegi jóndeý jumysy uzaqqa sozylyp ketken. Búgin ata-analar sebebin bilýge jınalyp, jattyǵýdy jalǵastyrý úshin qosymsha múmkindikter qarastyrýdy surady.&nbsp;</p>

Aqtóbe qalasynyń turǵyny Aıgerim Almýratovanyń aıtýynsha, onyń eki balasy 3 jáne 6 jyldan beri basseınge barady. Jattyǵýlarǵa úzbeı qatysyp júrgen balalary basseın jóndeýge jabylyp, ózgesine baǵyttaǵanda da úıirmeden qalmaǵan. Sóıtip eki balasy búginge deıin qalanyń eki jeke basseıninde memlekettik tapsyrys aıasynda jattyqty. Endi ol ekeýi de aqyly qyzmet qana kórsetetinin aıtyp, eskertý bergen. Ata-analar jóndeý jumysy uzaqqa sozylǵan basseın mańyna jınalyp, sebebin surady. 

– «Chaıka» basseıni 2023 jyldyń mamyr aıynda jóndeýge jabyldy. Bizge alǵashynda 1 jylǵa jabyldy dep aıtty. Sodan «Dostyq» basseınine bardyq. Ol basseın bıyl jazda jóndeýge jabyldy. Keıin balalardy qalanyń eski bóligindegi basseınge jáne «Poseıdon» basseınine jiberdi. Ekeýi de jeke. Buǵan deıin ákimdik bárin tólep keldi. Jeke basseın ıeleri endi barsaq aqyly ekenin eskertti. Sóıtip biz «Chaıka» basseınine qaıta baryp, jaǵdaıdy bilgimiz keldi. Az-maz jóndeý júrgizilgenimen, úlken ózgeris kórmedik. Dúısenbi kúni ashylady degenmen kúmándanyp otyrmyz»,- dedi Aıgerim Almýratova. 

Foto: Altynaı Saǵyndyqova

Aqtóbe oblystyq dene shynyqtyrý jáne sport basqarmasy bir mezette úsh basseındegi jóndeý men qurylystyń qatar kelip qalǵanyn túsindirdi. 

– «Chaıka» basseıni kelesi aptadan bastap qaıta jumysyn bastaıdy. Qurylys jumystarymen aınalysqan «Gradstroıservıs» merdiger mekemsi sot sheshimimen josyqsyz dep tanyldy. Qazirgi ýaqytta kompanııa jumysty aıaqtady. Osy ýaqyt aralyǵynda balalar jattyǵýyn úzbedi, tegin basseınge bardy. «Chaıka» basseıninen bólek, «Dostyq» basseınine de kúrdeli jóndeý jumystary júrgizilip jatyr. Mundaǵy barlyq jumystardy qańtar aıynda aıaqtaý josparlanǵan. Al «Delfın» basseıniniń ǵımaraty apattyq dep tanylyp, súrildi. Kelesi jyly sol jerde jańa basseın qurylysy júrgiziledi,- dep habarlady Aqtóbe oblystyq dene shynyqtyrý jáne sport basqarmasy. 

Foto: Altynaı Saǵyndyqova

Aıta keteıik, Aqtóbe oblysy boıynsha 3000-nan astam bala sý sport túrlerimen aınalysady.

Eske salsaq, bıyl Aqtóbede «Jaıly mektep» jobasy aıasynda birneshe mekteptiń qurylysy toqtap qaldy.