Aqtóbede ájethana jýýdan bas tartqan stýdent jelini shýlatty

AQTÓBE. QazAqparat - Aqtóbede medıtsınalyq ýnıversıtet stýdenti ájethana jýýǵa mindettegen oqytýshyǵa qarsylyq bildirdi. Joǵary oqý orny osy oqıǵaǵa qatysty túsinik berdi, dep habarlaıdy QazAqparat tilshisi.

Áleýmettik jelige stýdent pen oqytýshy arasyndaǵy urys-keris jarııalandy. Jazbada stýdenttiń jýynatyn bólmede júrgeni, buǵan deıin eden jýǵany, oqytýshynyń «ájethanany jý» dep tapsyrma bergeni anyq kórinedi. Ýnıversıtettiń stomatologııa bóliminde jyl saıyn 800 myń teńge tólep oqıtyn stýdentter bul mindetti jumysqa qarsylyq bildirdi.

Marat Ospanov atyndaǵy Batys Qazaqstan memlekettik medıtsınalyq ýnıversıtet ákimshiligi osy oqıǵaǵa qatysty túsinik berdi.

«Ýnıversıtettiń stomatologııa fakýltetine úsh qabat bólinip, kabınetter berildi. Sonymen qatar, stımýlıatsııalyq ortalyq ashyldy. Ǵımaratta kúrdeli jóndeý jumysy júrgizilgen soń fakýltettiń oqytýshylary men joǵary kýrs stýdentteri arasynda senbilik uıymdastyryly. Sol kezde olar tazartý jumysyna kómektesti. Qazirgi ýaqytta ýnıversıtet rektory Erbol Bekmuhambetovtyń tapsyrmasymen arnaıy komıssııa qurylyp, naqty jaǵdaı anyqtalyp jatyr. Nátıjesi boıynsha shara qoldanylady», - dep habarlady ýnıversıtettiń baspasóz qyzmeti.

QazAqparat tilshisi ýnıversıtetke baryp, mán-jaıdy anyqtamaq boldy. Ýnıversıtettiń stomatologııalyq kabıneti professor, kafedra meńgerýshisi Raısa Orazdyń issaparǵa ketkenin aıtty. Al medıtsına ǵylymdarynyń doktory, ınternatýra jáne rezıdentýra dekany Roza Nurǵalıeva stýdent aldymen ózine kelgende mundaı shý bolmas edi dep esepteıdi.

«Bul májbúrli jumys emes, senbilik. Eger stýdent maǵan kelip, shaǵym túsirgende tekserip, sheshim qabyldaıtyn edim. Qazir tehnologııa zamany bolyp tur. Men stýdenttiń nemese basshynyń jaǵyn qoldaı almaımyn. Bárine baspasóz qyzmetkeri jaýap beredi. Negizi ol jerde keńeıtý jumysy júrip, stýdentter tazartýǵa kómektesti. Oqytýshyǵa nege unamaı qalǵanyn komıssııa anyqtaıdy», - dedi Roza Nurǵalıeva.