Aqtóbede áıelin pyshaqtap óltirgen sottalýshyǵa úkim shyqty

<p>AQTÓBE. KAZINFORM - Aqtóbe oblysy Mártók aýdanynyń turǵyny áıelimen urysyp, keıin ony pyshaqtap óltirip tastady. Sottalýshy 11 jylǵa bas bostandyǵynan aıyryldy. Sondaı-aq jábirlenýshi taraptyń paıdasyna 10 mln teńge óndiriledi.</p>

Qylmystyq is Aqtóbe oblysynyń qylmystyq ister jónindegi mamandandyrylǵan aýdanaralyq sotynda qaraldy. Mártók aýdanynyń turǵynyna Qylmystyq kodekstiń «Adam óltirý» babymen aıyp taǵyldy. Іs materıalyna súıensek, bıyl 21 maýsym kúni túngi ýaqytta erli-zaıypty janjaldasyp qalady. Qyzǵanysh sezimine boı aldyrǵan sottalýshy mas kúıde áıeliniń shashynan tartyp, tamaǵyn pyshaqpen osyp jibergen. Keıin birneshe ret taǵy jaralap, áıel oqıǵa ornynda kóz jumdy.

«Sottalýshy kinásin tolyq moıyndap, qyzǵanyshtan óltirgenin jáne jasaǵan qylmysy úshin ókinetinin aıtty. Memlekettik aıyptaýshy taǵylǵan aıypty tolyqtaı qoldap, sottan sottalýshyǵa 11 jyl merzimge bas bostandyǵynan aıyrý jazasyn taǵaıyndaýdy surady. Sottyń úkimimen sottalýshyǵa 11 jyl merzimge bas bostandyǵynan aıyrý jazasy taǵaıyndaldy jáne jazasyn qylmystyq-atqarý júıesiniń qaýipsizdigi joǵary mekemesinde óteý belgilendi. Sottalǵannan jábirlenýshi ókiliniń paıdasyna moraldyq ótemaqy esebine 10 000 000 teńge óndiriledi. Sot úkimi zańdy kúshine engen joq», - dep habarlady Aqtóbe oblystyq sotynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.

Eske salsaq, №2 Aqtóbe qalalyq sotynda jappaı tóbeles kezinde tanysyna pyshaq suǵyp alǵan 20 jastaǵy jigit sottaldy. Ol 1 jyl 6 aıǵa bas bostandyǵynan aıyryldy.