Aqtóbede áıeli men qyzyn pyshaqtaǵan mektep dırektorynyń isi sotqa tústi

AQTÓBE. QazAqparat – Aqtóbede áıeli men qyzyn pyshaqtap tastaǵan mektep dırektorynyń isi oblystyq qylmystyq ister jónindegi mamandandyrylǵan aýdanaralyq sotynda qaralady. Sot ashyq ótedi, dep habarlaıdy QazAqparat tilshisi.

«Qylmystyq is sotqa tústi. Aldyn ala tyńdaý 2 aqpan kúni oblystyq qylmystyq ister jónindegi mamandandyrylǵan aýdanaralyq sotynda ótedi. Іs ashyq qaralady», - dep habarlady oblystyq sottyń baspasóz qyzmeti.

Bul oqıǵa byltyr Aqtóbe oblysy Shalqar aýdany Aqqaıtym aýylynda boldy. Jańaqonys aýyldyq okrýginiń ortalyǵy sanalatyn Aqqaıtym aýylynda orta mektep dırektory áıeli men balasyn pyshaqtap tastaǵan.

«Qylmystyq kodekstiń 99-baby, ıaǵnı adam óltirýge oqtalý boıynsha is qozǵalyp, tergeý júrip jatyr. Kúdikti eki aıǵa qamaýǵa alyndy. Ózge aqparat tergeý qupııalylyǵyna baılanysty taratylmaıdy», - degen edi oblystyq PD baspasóz qyzmetiniń jetekshisi Erbolat Sarqulov.

Sol kezde Shalqar aýdandyq aýrýhanasy bas dárigeriniń orynbasary Erkebulan Erkinuly oqýshynyń 7 jasta ekenin jáne ústinde tilikter baryn aıtty. Jarany tańyp, úıine jibergen. Sebebi, jábirlenýshiler aýrýhanada em qabyldaýdan bas tartqan.