Aqtóbede áıel men balany óltirip, sodan keıin ózi mert bolǵan sottalýshyǵa syrttaı úkim shyqty

<p>AQTÓBE. KAZINFORM &ndash; Aqtóbe oblystyq qylmystyq ister jónindegi mamandandyrylǵan aýdanaralyq sotynda mert bolǵan sottalýshyǵa úkim shyqty. Ol áıel men onyń ulyn óltirip, oqýshy qyzdy pyshaqtaǵany úshin kináli dep tanylǵanymen, jaza taǵaıyndalmady.</p>

Qylmystyq oqıǵa byltyr 29 naýryz kúni boldy. Kúdikti tańda beıtanys páterge balkon arqyly kirip, úıdegi 35 jastaǵy áıel men onyń ulyn pyshaqtap óltirip tastaǵan. Keıin kámelet jasqa tolmaǵan qyzǵa da pyshaq suqqan. Saldarynan ol aýrýhanaǵa jatyp, em qabyldady. Al kúdikti ustalǵanymen, kóp uzamaı tergeý ızolıatorynda óz-ózine qol jumsady.  Osyǵan qaramastan marqum sottalýshynyń anasy balasynyń kinásiz ekenin dáleldemek bolyp, isti sotqa jetkizdi. 

«Qylmystyq is boıynsha turǵyn, qyzmettik, óndiristik úı-jaıǵa ne qoımaǵa zańsyz kirýmen jasalǵan qaraqshylyq, eki nemese odan da kóp adamdy óltirý, jas balany óltirý baptary boıynsha aıyp taǵylyp, is qaraldy. Sot otyrysynda taraptar tyńdaldy, kýágerlerden jaýap alyndy. Kámeletke tolmaǵan jábirlenýshi qarańǵyda er adamdy kórgenin aıtty. Ol kezde balkon arqyly páter ishine jaryq túsip turǵan. Kúdikti qara kıim kıgen adam bolǵan. Sonymen birge sot otyrysynda kóshedegi beınebaqylaý kamerasynyń jazbasy talqylandy. Qaza bolǵan sottalýshy sol mańda birneshe ret júrgen. Sot qylmys jasaǵan soń úıine kelip, kıimin jýyp tastaǵanyn anyqtady. Velosıpedpen úıine bara jatqanda qulaǵany da belgili boldy. Bul tergeý kezinde jazylǵan beınematerıaldan anyq kórindi. Ol kánili dep tanyldy. Biraq jaza taǵaıyndalmaıdy», - dedi sýdıa Jánibek Seıitjaparov.

Sot otyrysy kezinde jábirlenýshi tarap azamattyq talap aryz túsirdi. Olar sottalýshydan 10 mln teńge moraldyq shyǵyn óndirý týraly talap qoıdy. Jerleý rásimine ketken 800 myń teńge materıaldyq shyǵyndy óndirýdi de surady. Sot sottalýshynyń qaıtys bolǵanyna baılanysty azamattyq talap aryzdy qanaǵattandyrmady.

Sot úkimi kúshine engen joq.