Aqtóbede aýyz sýdyń qory munaımen lastanyp jatyr
Aqtóbe oblystyq tabıǵı resýrstar jáne tabıǵatty paıdalanýdy retteý basqarmasy Kókjıde ken ornyndaǵy jerasty sýyn 2009 jyldan beri baqylap otyr. Qazirgi kezde bul ken ornynda 7 munaı óndirýshi kompanııa bar. «SNPS-Aqtóbemunaıgaz» AQ, «KMK Munaı» JShS, «AdaOıl» JShS munaı óndirý jumystarymen aınalyssa, ózgesi barlaý júrgizip jatyr.
«Barlaý, munaı burǵylaý jumystary júrip jatqan ken oryndarynyń janynda 17 uńǵyma bar. Osy uńǵymalar arqyly aýyz sý quramy tekseriledi. Jylyna úsh ret tekserilgen kezde aýyz sýdyń lastanýy tirkelip otyr. Bıyl «KMK Munaı» kompanııasynyń aýmaǵynda, Uryqtaý ken ornynda sýdyń lastanýy tirkeldi», - dedi Aqtóbe oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Nurjan Aqqul.
Aıta keteıik, oblystyq basqarma Energetıka basqarmasyna Kókjıde ken ornyndaǵy aýyz sý qoryn lastaıtyn uńǵyma jumysyn toqtatý týraly usynys berdi. Sonymen qatar, aýyz sý quramyn tekserý jumysyn ortalyqtandyrýdy usyndy. Negizi Kókjıde ken ornyn ıgerip jatqan munaı kompanııalary uzaqmerzimdi kelisimshart boıynsha jumys istep jatyr. Ázirge eshqaısysynyń kelisimsharty aldaǵy 10 jylda aıaqtalmaıdy.