Aqtóbede aýylǵa gaz berilip, ambýlatorııa iske qosyldy

AQTÓBE. QazAqparat – Aqtóbe oblysyndaǵy Alǵa aýdanynyń Erkin kúsh aýylyna kógildir otyn berilip, Eset batyr aýylynda dárigerlik ambýlatorııa ashyldy, dep habarlaıdy QazAqparat tilshisi.

Alǵa aýdanynyń Erkin kúsh aýylyn gazben qamtý jumysyna 31 mln teńge bólindi. Endi 45 úıi bar aýyl turǵyndary kógildir otyn paıdalanady. Buǵan deıin jyl saıyn kómir satyp alýǵa 200 myń teńge jumsaıtyn Albına Ońǵar úı jumysynyń azaıǵanyna rıza.

«Otyndy qaladan ákelý úshin kólik jaldaıtynbyz. Tańerteń uıqydan turǵan boıda aldymen ot jaǵamyz. Endi osynyń barlyǵy artta qalǵanyna qýanyp turmyz»,- deıdi ol.

Búginde oblys halqynyń 92,5% gazben qamtylǵan. Gazdandyrý kórsetkishi boıynsha óńir respýblıkada besinshi orynda. Tek osy jyldyń ózinde 7,9 myńnan astam halqy bar 14 eldi meken gazdandyryldy. Jyl sońyna deıin 2 myńdaı adam turyp jatqan taǵy eki aýyldy gazben qamtý josparda bar. Nur Otan partııasynyń Jol kartasyna saı 2025 jylǵa deıin oblystyń 104 eldi mekenin gazben qamtý josparlanyp otyr.

Sol kúni Alǵa aýdanynyń Eset batyr aýylynda jańa dárigerlik ambýlatorııa ashyldy. «Aýyl el besigi» memlekettik baǵdarlamasy aıasynda medıtsınalyq mekemeni salýǵa jáne jaraqtandyrýǵa 103 mln teńge bólingen.​ Ambýlatorııa kúnine qyryq adamdy qabyldaýǵa qaýqarly.

«Memleket basshysynyń tapsyrmasyna sáıkes, jergilikti atqarýshy organdar halyq turmysynyń deńgeıi men sapasyn kóterý boıynsha túrli sharalardy qabyldaýda. Sonyń ishinde, halyqqa turatyn jerleri boıynsha medıtsınalyq kómektiń qoljetimdiligin qamtamasyz etý úshin medıtsınalyq uıymdar jelisi keńip jatyr. Bul jumys barlyq aýdandarda júrgizilip jatyr. Bıyl osyndaı jeti ambýlatorııa paıdalanýǵa berildi. Olardyń bári de qajetti zamanaýı jabdyqtarmen qamtylǵan»,- dep atap ótti Aqtóbe oblysynyń ákimi Ońdasyn Orazalın.