Aqtóbede aýyldas oqýshyny abaısyzda uryp óltirgen stýdent sottaldy

AQTÓBE. QazAqparat – Aqtóbeniń Shalqar aýdany Begimbet aýylynda stýdent pen oqýshylar ishimdik iship, keıin sottalýshy E.Dostanov jábirlenýshi Tynyshtyqbaevty keýde tusynan bir ret teýip qulatqan. Abaısyzda bolǵan ólimnen soń is qozǵalyp, búgin sottalýshy 8 jylǵa bas bostandyǵynan aıyryldy, dep habarlaıdy QazAqparat tilshisi.

Aqtóbe oblysy Shalqar aýdany Begimbet aýylyndaǵy qaıǵyly oqıǵa byltyr jeltoqsan aıynda boldy.

Sol kezde Shalqar aýdandyq aýrýhanasynyń bas dárigeri Jangeldi Bylqaıyr oqıǵa bolǵan kúni 9-synyp oqýshysyn aldymen meıirbıkeniń úıine aparǵanyn, balanyń tynys almaı jatqanyn bilgen meıirbıke úı janynda turatyn dárigerge habar bergenin aıtty.

Búgin Qylmystyq kodekstiń 106-baby 3-bóligimen sottalýshy E.Dostanovqa úkim shyqty.

Іs Aqtóbe oblystyq kámeletke tolmaǵandar isteri jónindegi mamandandyrylǵan aýdanaralyq sotynda qaraldy.

Sot materıalyna súıensek, 2006 jyly týǵan sottalýshy Aqtóbe qalasyndaǵy kolledjderdiń birinde bilim alady.

Ol byltyr jeltoqsan aıynda Begimbet aýylyndaǵy 9, 10, 11 synyp oqýshylarymen birge ózara áńgimelesip otyryp, úı syrtyndaǵy aýlada ishimdik jasyrǵanyn, ony ishýge usynys jasaıdy.

Olar araqty alyp, 6 bala ishimdik ishedi. Tipti sol otyrysta sottalýshynyń inisi de bolady.

«Kámeletke tolmaǵan Dostanov týǵan inisi ózimen birge araq iship turǵanyna ashýlanyp, «nege araq ishesiń» dep birneshe ret uryp-soqqan. Sol kezde «qaqpany aparyp, ornalastyryńdar» degen tapsyrmasy oryndalmaǵany esine tústi. Janyna kelgen ózinen kishi balalarǵa sapqa turýdy buıyrǵan. Birneshe bala ózderine aıtylǵan sózdi estip, Dostanovtyń jasy úlken ekenin eskerip, sapqa turǵan. Osy kezde Dostanov sapta turǵan árqaısysyn uryp, soqqy jasaǵan. Janynda turǵan ózge bala da judyryǵymen urǵan. Sodan soń Dostanov qaıtadan uryp, tepken. Al Jalmuratovtyń qasyna kelgen kezde oń aıaǵymen bir ret tebedi. Qatty soqqy jasaǵan. Sóıtip Dostanov jábirlenýshiniń ólimine ákep soqqan densaýlyqqa abaısyzda zııan keltirgen»,- dedi sýdıa Mırash Júginisova.

Sottalýshy E.Dostanov Qylmystyq kodekstiń 106-baby 3-bóliginde kózdelgen qylmystyq buzýshylyq jasaǵany úshin kináli dep tanyldy.

Ol 8 jylǵa bas bostandyǵynan aıyryldy. Jazasyn kámeletke tolmaǵandardy ustaýǵa arnalǵan qaýipsizdigi ortasha mekeme óteıdi.

Sotta azamattyq talap aryz da ishinara qanaǵattandyryldy.

Sottalǵan Dostanovtyń zańdy ókilderinen yntymaqtastyq tártipte jábirlenýshige moraldyq shyǵyn retinde 10 mln teńge, materıaldyq zalal retinde 1,6 mln teńge óndiriledi.

Biraq bul úkimmen jábirlenýshi tarap kelispedi.

«Úkimmen kelispeımin. Qazir 1 jyly ótti. 7 jyl otyrady da qaıtyp keledi, boldy. Tiri adam ǵoı. Bizdiki ólip qaldy, kelmeske ketti. Bul ádiletsizdik. Balam bıyl 9-synyp bitiretin edi. Kóshege ketken balanyń arada 2-3 saǵat ótkende denesi kelip tur. Balam daryndy edi. Bir adamǵa qol kóterip kórmegen. Únemi telefon, shańsorǵysh, velosıped sekildi kez kelgen dúnıeni jóndeıtin. Tehnıkaǵa qumar. Jalǵyz ulymdy 9-synyp bitirgen soń ІT salasyna túsirmek edim»,- dedi mert bolǵan oqýshynyń ákesi Rýslan Jalmuratov.

Jábirlenýshiniń qorǵaýshysy Marat Taıjanuly da sottalýshynyń kináni moıyndamaǵanyn aıtyp, eń aýyr jaza taǵaıyndaýy tıis edi dep esepteıdi.

Onyń aıtýynsha, sottalýshynyń ata-anasy, týǵan týystary keshirim de suramaǵan.