Aqtóbede aýyl turǵyndary qum tasıtyn kásiporyn jumysyna qarsy shyqty
«Elek ózeninen mal sý ishedi, sýarmaly egin sharýashylyǵyna paıdalanamyz. Qum tıegen jumysshylar ózenniń aǵysyn ózgertip jiberdi. Sý quryp ketýdiń az-aq aldynda tur. Tabıǵatty qorǵaıtyn, bizge jany ashıtyn adam kerek. Qumdy temirjol mańyna tasyp jatyr. Úsh jyl boldy. Atyraý men Aqtaýǵa jiberip jatqan sekildi»,- dedi aýyl turǵyny Dına Maıqaraeva.
Kompanııa aýyl mańyndaǵy karerden jylyna 2 myń tonna qum óndiredi.
Turǵyn úı qurylysy, jol jóndeý jumystaryna qajetti shıkizatty shyn máninde Aqtóbe men Atyraýǵa jóneltip jatyr.
«Alǵa aýdany, Bestamaq aýylynda turamyn. Tabıǵat bir-birine baılanysty. Qum, tal, sý. Qum tazartý quraly bolsa, aǵashty sorǵy dep aıtar edim. Aǵash ketse sý ketedi, ózen aǵysy buzylsa ıirim paıda bolady. Al ıirimge túsken adam da, mal da aman shyqpaıdy. Taıaýda bir bala kóz jumdy. Sýsyz qalamyz dep qorqamyz», - dedi aýyl turǵyny Qalybaı Kózdibaev.
Aýyl turǵyndary ózen mańynyń qazirgi hálin beınekameraǵa túsirip, biraz materıal jınaqtady. Tıisti organdarǵa aryzyn da jazǵan.
«Elek ózeniniń jolyn buzdy. Aǵashty kesip tastady. Beıittiń janyn qazyp, tereńdigin 15-20 metrge jetkizdi. Aýyl úshin bul orny tolmas ókinish. Memlekettik organdardan jaýap ala almaı otyrmyz. Talap boıynsha karer ortalyǵy aýyldan 5 shaqyrym bolýy tıis. Al bizde 3 shaqyrymǵa jetpeıdi. Úsh jyl boıy eshkim nazar aýdarmady, eshkim kelmeıdi. Ekologııalyq apatty qoldan jasap otyrmyz», - deıdi aýyl turǵyny Nurbek Jubanqosov.
Al Aqtóbe oblystyq ekologııa departamentine Alǵa aýdandyq polıtsııa bóliminen úsh is tústi.
«PGS» JShS-ine qatysty materıalda ekologııalyq zańbuzýshylyqtar týraly jazylǵan. Іs ınspektorǵa berildi. Keıin tekserý júrgiziledi. Negizi qum óndirýge qatysty suraqta ruqsat qujatty ekologııa departamenti bermeıdi. Sondyqtan qazir biz mınıstrlik pen prokýratýradan jaýap kútip otyrmyz»,- deıdi oblystyq ekologııa departamenti bóliminiń basshysy Ǵasyr Orynbasarov.