Aqtóbede «Aýyl amanatyna» qatysýshylar óndirgen ónim satylatyn alǵashqy pavılon ashyldy
«Haraket A» ÁKK basshysy Nursultan Bekbaýov pavılonnyń ashylýyna joba qatysýshylary qarajat bólgenin, barlyǵy 4,5 mln teńge jumsalǵanyn aıtty.
Munda okrýgtiń eldi mekenderinen «Aýyl amanaty» jobasyna qatysýshy 6 jeke qosalqy sharýashylyqtyń ónimi usynylǵan. Aqtóbelikter qoljetimdi baǵamen jańa jáne sapaly sút ónimderin, shokoladpen qaptalǵan qulpynaı, tary, jent, irimshik, kurt jáne taǵy da basqa ónimderdi satyp ala alady.
Aıta keteıik, Mártók aýdany – «Aýyl amanaty» jobasyn júzege asyrýda kóshbasshy eldi meken. Aýdan turǵyndarynan jobaǵa qatysý úshin 864 mln teńgege 167 joba qabyldanǵan, 91 joba iske asyrylyp jatyr. Jobanyń arqasynda Táńirbergen aýyl okrýgi belsendilik tanytyp keledi, munda jumyssyzdyq joıyldy.
«112,2 mln teńgege 25 joba maquldandy. 10 otbasy qus sharýashylyǵymen, 7 jeke qosalqy sharýashylyq – ósimdik sharýashylyǵymen, 8-i shaǵyn bıznes ashýmen aınalysýda. «Aqtóbe» ÁKK-de taǵy 5 joba qaralyp jatyr. Biz olarǵa oblys ortalyǵynan saýda núktesin ashyp, ónimdi satýǵa járdem kórsetýge ýáde berdik. Aýyl turǵyndary óndiristi jolǵa qoıdy, al biz tikeleı ótkizý naryǵyn uıymdastyrdyq», - dedi óńir basshysyna aýyl okrýginiń ákimi Medet Bekjanov.
«Jumyssyzdardyń bolmaýy – eń basty nátıje. Joba aýyl turǵyndarynyń ál-aýqatyn arttyrýǵa jáne aýyldarymyzdy damytýǵa baǵyttalǵan. Basqa aýyldyq okrýgter de jobaǵa belsendi qatysýy tıis», - dep atap ótti Eraly Toǵjanov.
Jalpy, óńir boıynsha 6,5 mlrd teńgege «Aýyl amanaty» jobasyna qatysýǵa 1337 ótinim berildi, 1006 joba maquldandy, 2,1 mlrd teńgege 485 joba qarjylandyryldy. Jobany iske asyrý boıynsha Mártók, Qarǵaly jáne Hromtaý aýdandary – kóshbasshy.