Aqtóbe oblysynda aýyl turǵyndary 5 kún jaryqsyz qaldy

<p>Aqtóbe oblysy Baıǵanın aýdanynyń ortalyǵynda turǵyndar bes kún jaryqsyz qaldy. Qazirdiń ózinde elektr qýaty birneshe saǵatqa qosylyp, qaıta ajyratylyp otyr, dep habarlaıdy <a href="https://kaz.inform.kz/" target="_blank" rel="noopener">Kazinform tilshisi.</a></p>

Baıǵanın aýdanynyń ortalyǵy Qaraýylkeldi aýylyndaǵy Birlik, Soltústik, Jańaqurylys kóshelerinde jaryq 5 qazannan 6 qazanǵa qaraǵan túni óshken. Tekserý kezinde jerasty jelisiniń úzilgeni belgili boldy. Biraq aqaý naqty qaı jerden shyqqanyn anyqtaý qıynǵa túsken.

«Kabel úzilip ketken. Naqty qaı jer ekenin anyqtaý úshin oblys ortalyǵynan laboratorııa shaqyrtyldy. Taǵy bir joly – jańa kabel tartý. Sebebi aqaýdy tapqanmen, bizge rezerv kerek. Bári birdeı jaryqsyz otyrmaıdy. Bir kóshe sóndirilip, ekinshi kóshe qosylady. Negizi 4 kóshede 250 adam bar», – dedi Baıǵanın aýdanynyń ákimi Qaırat Otarov.

Kazinform tilshisi jańa ǵana Baıǵanın aýdany ákiminiń orynbasary Rústem Raýshanovqa habarlasyp, mán-jaıdy surady. Onyń aıtýynsha, jer qazylyp, 140 metr kabel tartyldy.

«Qazir qosý jumysy júrip jatyr. Jelini alma kezek tekserýden ótkizemiz. Negizi Aqtóbeden laboratorııa kelip, aqaý bolǵan jerdi anyqtady. Biraq ony jalǵaýdy emes, jańasyn salýǵa basymdyq berdik. Sol kezde bizde rezerv bolady. Osy jańasyn qosyp, eskisin jóndep qoıamyz. Jańa jeli úshin 140 metr kabel alyndy. Jóndeý júrgizgender naqty qansha qarjy jumsalǵanyn aıtpady. Eseptep, shyǵaryp beredi. Qarjy bıýdjetten bólinedi», – dedi Rústem Raýshanov.