Aqtóbede aýyl mektebiniń qazandyǵynan aqaý shyǵyp, oqýshylar onlaın bilim alyp júr
Aqtóbe oblysy Yrǵyz aýdany Quılys aýylyndaǵy mektep buǵan deıin kómir arqyly jylytyldy. Bıyl qazandyqty elektr togyna aýystyrý josparlanǵan.
— Tokty transformatordan qazandyqqa jalǵady. Sol kezde nasos janyp ketti. Balalar onlaın oqýǵa jiberildi. Buzylǵan nasos jóndeldi. Ony iske qosqan kezde sabaq shtattyq rejımde jalǵasady, — dedi Aqtóbe oblystyq bilim basqarmasynyń bólim basshysy Lázzat Ýrdabaeva.
Quılys aýylyndaǵy jalpy bilim beretin orta mektepte barlyǵy 121 oqýshy bar. Olar eki kún boıy sabaqty onlaın oqydy.
— Bıyl aqpan aıynda eki qazandyqtyń biri isten shyqty. Naýryz aıynda bir ǵana qazandyqpen jylytyp, sáýirde tasqynǵa baılanysty evakýatsııa júrdi. Aýdan ákimi tokqa aınaldyramyz dep aıtty. Sheshim qabyldandy. Biraq 11-31 qazan aralyǵynda kómir jaqtyq. Sodan keıin balalar birinshi toqsanda demalysqa ketti. Sol kezde qazandyq tokpen jylytýǵa qosyldy. Keshegide aqaý shyǵyp, eki kúnde qalpynp keltirildi. Qazir temperatýra qalypty. Mektep eki qabatty. Bıyl balabaqshany qosyp jiberdi. Oqýshylar men tárbıelenýshiler eki bólek esikpen kiredi, — dedi Quılys jalpy bilim beretin orta mektep dırektory Ǵazız Samat.
Onyń aıtýynsha, jylytý qazandyǵynda eki nasos bar. Onyń biri isten shyqsa, ekinshisimen jylý berýge bolady. Jylytý qazandyǵyn kómirden tokqa aýystyrý jumystary nelikten jazda júrgizilmegenin dırektor naqty aıta almady.
— Qarjylyq suraqtarǵa men jaýap bere almaımyn. Birinshi toqsandaǵy 11 kúnde kómir jaqtyq. Ol úshin 27 tonna kómir berdi, — dedi Ǵazız Samat.
Eske salsaq, Aqtóbe oblysynda barlyq baǵyttaǵy joldarǵa jaýaptylar qysqa ázirlendi. Bıyl óńirde 129 jylytý beketi jumys isteıdi.