Aqtóbede aýdandyq bilim bóliminiń basshysy sottaldy

AQTÓBE. QazAqparat - Aqtóbe oblysy Alǵa aýdandyq bilim bóliminiń basshysy qyzmettik ókilettiligin asyra paıdalanyp, kásippen aınalysqany úshin sottaldy. Oǵan 3 jyl 6 aı bas bostandyǵynan shekteý túrindegi jaza kesildi, dep habarlaıdy QazAqparat tilshisi.

Alǵa aýdandyq soty Qylmystyq kodekstiń laýazymdyq ókilettiligin teris paıdalaný, qyzmettik jalǵandyq jasaý jáne kásipkerlik qyzmetke zańsyz qatysý baptary boıynsha aýdandyq bilim bóliminiń basshysyna qatysty isti qarady. Іs materıalyna súıensek, Alǵa aýdandyq bilim bóliminiń basshysy oqý ortalyǵyn ashqan. Jumysyn júrgizý úshin tanysyna tıesili jeke kásipkerdiń atyn paıdalanady. Sóıtip, balalarǵa qosymsha bilim berý qyzmetin kórsetý úshin konkýrsqa túsip, 1,2 mln teńge utady.
Sonymen birge, jaz aıy aıaqtalar tusta jetim, ata-anasynyń qamqorlyǵynsyz qalǵan, tumysy tómen, kópbalaly otbasy balalary, múgedektigi bar 300 balany 12 kúndik lagerge jiberýdi josparlaıdy. Joldama satyp alýǵa 18 850 000 teńge bólingen. Ýaqyt tyǵyz, qarjyny ıgerýge úlgermeıtinin bilse de, sottalýshy memlekettik satyp alýdy ótkizý týraly sheshim qabyldaıdy. Nátıjesinde konkýrs sharttary ózgertilip, lagerge 12 kúnge emes, 7 kúnge jiberilgen. Lagerge barǵan 203 balanyń 160-y arnaıy sanatqa jatpaıtyny da anyqtaldy. Al, qujat boıynsha 300 bala 12 kúndik demalysta bolǵany jazylǵan.
«Sottalýshynyń zańsyz áreketteriniń nátıjesinde bilim bólimi seriktestik shotyna 10 280 674 teńge somasynda bıýdjet qarajatyn negizsiz aýdardy. Qylmystyq is Aqtóbe oblysy prokýrorynyń orynbasary men sottalýshy arasynda jasalǵan kináni moıyndaý týraly protsestik kelisimmen sotqa kelip tústi. Sottalýshy sot otyrysynda protsestik kelisimniń mazmunyn qoldap, belgilengen jazamen de kelisetinin málimdedi. Prokýror protsestik kelisimde sottalýshynyń shyn ókingenin, kináni moıyndaǵanyn jáne zalaldy erikti túrde ótegenin eskerdi. Jazany óteýdiń búkil merzimi ishinde jyl saıyn 100 saǵattan májbúrli eńbekke tarta otyryp, 3 jyl 6 aı merzimge bas bostandyǵyn shekteý túrindegi jaza taǵaıyndaý týraly ótinish bildirdi. Sondaı-aq, memlekettik qyzmette laýazymdardy atqarý quqyǵynan ómir boıyna aıyrý túrinde qosymsha jaza taǵaıyndaýdy surady. Sot kórsetilgen jazany taǵaıyndaı otyra, protsestik kelisimdi bekitti. Sot tarapynan Aqtóbe oblystyq bilim basqarmasynyń basshylyǵyna jeke qaýly shyǵaryldy. Sot úkimi zańdy kúshine engen joq», - dep habarlady oblystyq sottyń baspasóz qyzmeti.