Aqtóbede aýdan ákimi bilikti teolog izdep júr
Aqtóbeniń Muǵaljar aýdanynda jat aǵym jeteginde júrgender áldeqaıda kóp. Qazirgi kúni esepte 450 adam tur. Kóbi otbasyly, balaly-shaǵaly. Esep boıynsha, barlyǵy 192 otbasynyń dinı kózqarasy aýdandyq ishki saıasat janynan qurylǵan dinı ortalyqtyń baqylaýyna alynǵan. Olardy týra jolǵa salý qıyn. Sondyqtan bilikti dinı qyzmetkerler men teologtarǵa suranys bar.
«Aýdanda qazir 10 meshit bar. Oǵan 1500 adam syıady. Jalpy 800-ge jýyq jamaǵat meshitke barady desek, onyń 450-i adasyp júrgen bizdiń baýyrlarymyz. Bıyl aýdandyq ishki saıasat basqarmasy janynan úlken ortalyq ashyldy. Oǵan jaqsy, saýatty teologtar tartýymyz kerek. Osydan bir apta buryn Almaty qalasyna baryp, Nur-Múbárak ýnıversıtetteriniń stýdentterimen kezdesken bolatynmyn. Ol jaqta Aqtóbe oblysynan 53 stýdent bilim alyp júr. Stýdenttermen kelissóz júrgizdik. Bıyl eki stýdent ýnıversıtet bitirip, Qandyaǵash qalasyndaǵy ortalyqqa jumysqa kelýge nıet bildirip otyr»,- dedi Muǵaljar aýdanynyń ákimi Erbol Danaǵulov.
Aýdanda ashylǵan ortalyqta 15 adam jumys istemek. Olardyń teń jartysy qoǵammen jumysty jandandyrsa, ózgesi dinı ahýaldy qolǵa alady.
«Adasyp júrgen adamdardy keıin qaıtarý qıyn. Degenmen, biz jumys isteımiz. Jeńiske de, jetistikke de jetemiz. Bir aıda jat aǵym jeteginde júrgen 20 adamnyń betin beri qaıtarýymyz múmkin. Nátıjesi kelesi aıda belgili bolady»,- dedi aýdan ákimi.