Aqtóbede áskerı tehnıkanyń ústinen dron ushyrǵan adam ustaldy
Aqtóbedegi 30238 áskerı bólimniń qaraýyl bastyǵy Oljas Zarlyhanov tehnıkanyń ústinde ushyp júrgen kvadrokopterdi kórip, kezekshi bólimdegi Nurjan Baısaqalovqa habar bergen. Qorǵanys mınıstrligi men Bas shtab talaby boıynsha jedel qımyldaıtyn jasaq shaqyrylyp, ushatyn apparattyń ıesin izdedi.
«Dron men onyń ıesi 30238 áskerı bólimniń mańynan ustaldy. Kvadrokopter ıesiniń aıtýynsha, apparatty bir kún buryn ǵana satyp alǵan jáne alǵash ret áskerı bólim mańynda ushyrǵan. Mán-jaıdy polıtsııa qyzmetkerleri anyqtaıdy. Aqtóbe garnızonynyń áskerı polıtsııasy ushý quralynyń memlekettik reestrde tirkeýge alynbaǵanyn anyqtady», - dep habarlady T.Bıgeldınov atyndaǵy áýe qorǵanys kúshteri áskerı ınstıtýtynyń baspasóz qyzmeti.
Aıta keteıik, talap boıynsha ushqyshsyz tehnıka ıesi mindette túrde Azamattyq avıatsııa komıtetinen jazbasha ruqsat alyp, drondy tirketýi kerek. QR Ákimshilik quqyqbuzý kodeksi boıynsha zańdy tulǵaǵa 10 AEK deıin aıyppul salynýy múmkin.
«Dron ıesi oblystyq polıtsııa departamentine jetkizildi. Ol alǵash ret ushyryp turǵan soń basqarýdy durys bilmegenin aıtyp berdi. Biraq bilmestik ony jaýapkershilikten bosatpaıdy», - dedi áskerı ınstıtýttyń baspasóz qyzmeti.