Aqtóbede ashylǵan «Halyqtyq keńse» qandaı qyzmetter kórsetedi

AQTÓBE. QazAqparat - Elimizdegi alǵashqy «Halyqtyq keńse» Aqtóbede ashyldy, dep habarlaıdy QazAqparat tilshisi.

Aqtóbede «Halyqtyq keńse» óz jumysyn bastady. Qyrkúıek aıynyń ortasynda jumysyn bastap ketken ortalyq 20 myń adamdy qabyldap, qujattaryn rásimdeýge kómektesken. Búgin Aqtóbe oblysynyń ákimi Berdibek Saparbaev ortalyq jumysynyń qyr-syryn QR Bas prokýrorynyń orynbasary Andreı Lýkınge túsindirdi. Artyqshylyǵy, birneshe memlekettik organ bir ortalyqta otyrady. Barlyǵy 600-den astam qyzmet kórsetiledi. Tipti Aqtóbe qalasynyń ákimi men onyń orynbasarlary «Halyqtyq keńsede» azamattardy jeke suraqtary boıynsha qabyldaıdy.

Aıta keteıik, jańa ortalyq Elbasy Nursultan Nazarbaevtyń «100 naqty qadam» Ult josparynda kórsetilgen transparentti jáne halyqqa esep beretin memleketti qurý tapsyrmasyn iske asyrý aıasynda jumysyn bastady. Halyqtyq keńsede» jergilikti atqarýshy organ qyzmetkerleri, Turǵyn úı qurylys jınaq bankiniń ókilderi, qarjy ınstıtýttary, «Damý» qory, kommýnaldy kásiporyndardyń ókilderi jumys isteıdi. Munda Halyqqa qyzmet kórsetý ortalyǵy men «Qazposhta» AQ-nyń qyzmetkerleri de bar. Ári munda  Quqyqtyq qyzmet ortalyǵy jumys istep tur.

 

«Bul jumysty jalǵastyryp, keńeıtý kerek. Oǵan qosa, ortalyq qyzmetin aýdan turǵyndary paıdalanady. Olarǵa endi túrli memlekettik organdarǵa baryp, kezekte turmaıdy. Eń bastysy, bul azamattardyń túrli suraqtaryn sheshýde memlekettik jáne quqyq qorǵaý qurylymdarynyń jumystaryn qoljetimdi ári ashyq etýge baǵyttalǵan jumys»,- dedi QR Bas prokýrorynyń orynbasary Andreı Lýkın.

«Halyqtyq keńse» - Bas prokýratýranyń bastamasymen oblystyq prokýratýranyń, oblys ákimdiginiń qoldaýymen júzege asyrǵan joba. Jobanyń maqsaty - azamattardyń memlekettik jáne quqyq qorǵaý organdaryna degen senimin arttyrý, olardyń máselelerin tıimdi sheshý, sapaly quqyqtyq qyzmetke «bir tereze» qaǵıdasy boıynsha qol jetkizý. Prokýratýra, ishki ister, ádilet organdarynyń, oblys ákimdigi qyzmetkerleriniń, sondaı-aq qorǵaýshylar men medıatorlardyń keńesterin alýǵa múmkindikteri bar. QR Bas prokýrordyń orynbasary Andreı Lýkın Quqyqtyq qyzmetter ortalyǵynyń qyzmetin joǵary baǵalady.