Aqtóbede apaly-sińlili eki qyz týǵan ákesi zorlaǵanyn aıtyp aryz jazdy

AQTÓBE. QazAqparat - 22 jáne 14 jastaǵy aqtóbelik qyzdar «NeMolchı.kz» qoryna habarlasyp, kómek surady. Olardyń aıtýynsha, týǵan ákesi seksýaldyq sıpattaǵy zorlyq kórsetken. Qazir qylmystyq is qozǵaldy, dep habarlaıdy QazAqparat tilshisi.

Qoǵam belsendisi Dına Tańsári áleýmettik jelidegi paraqshasynda Aqtóbeden habarlasqan apaly-sińlili eki qyzdyń bastan keshken oqıǵasy jaıly habarlady.

«Týǵan ákesinen zábir kórgen qyzdyń úlkeni 20 jasta bolsa, kishisi 14 jasta. Úlkeni 6-7 jasynda qorlyq kórgen. Ákesi oǵan jynystyq múshesin ustatyp, zorlyq jasaǵan. Anasy ekeýi muny jasyryp qalýdy jón kóripti. Kishi qyz 10-11 jasynda zorlyq kórgen eken. Sińlisiniń zorlanǵanyn estigen apasy ekeýi 22 maýsym kúni polıtsııaǵa aryz túsirdi. Olar ákesimen ońasha qalýǵa qoryqqan. Anasy túngi kezekke shyqqanda úıge qonbaı júrgen. Úlken qyzynyń aıtýynsha, ákesi úsh ret sottalǵan. Ekeýinde zorlyq jasaǵany úshin, bireýi - buzaqylyq»,- dep jazdy Dına Tańsári.

Oblystyq polıtsııa departamenti bul oqıǵaǵa qatysty qylmystyq is qozǵalǵanyn habarlady.

«Aqtóbe oblysynyń polıtsııa departamenti Qylmystyq kodekstiń 120-baby 4-bóligi boıynsha tirkelgen qylmystyq isti tergep jatyr. Іs boıynsha birqatar saraptama taǵaıyndaldy. Onyń nátıjesi boıynsha zańdy sheshim qabyldanady. Sotqa deıingi tergeý derekteri Qylmystyq protsessýaldyq kodekstiń 201-babyna sáıkes jarııa etýge jatpaıdy»,- dep habarlady oblystyq PD baspasóz qyzmetiniń jetekshisi Erbolat Sarqulov.