Aqtóbede anasyn óltirgen oqýshy men onyń súıiktisine sot úkimi shyqty

AQTÓBE. QazAqparat – Aqtóbede anasyn óltirip, birneshe kún boıy múrdesin páterde ustaǵan oqýshy men onyń súıiktisine qatysty is sotta qaraldy. Búgin qylmystyq iske úkim shyqty, dep habarlaıdy QazAqparat tilshisi.

QazAqparat buǵan deıin de Aqtóbede anasyn óltirgen oqýshy isiniń egjeı-tegjeıin baıandaǵan bolatyn.

Aqtóbe oblystyq qylmystyq ister jónindegi mamandandyrylǵan aýdanaralyq sotynda sottalýshy A.Kóljan jáne A.Sarınaǵa qatysty is qaralyp, búgin úkim oqyldy.

Іs materıalyna súıensek, jábirlenýshi 2022 jyldyń 14 sáýir kúni saǵat 21:00-den óte qyzynyń jigitin úıine shaqyryp, shaǵyn jóndeý jumystaryn jasap berýdi suraıdy. Jýynatyn bólmedegi burandalardy aýystyrý keregin aıtady.

Sol kúni aıyptalýshy jigit saǵat shamamen 23:00-de úı jumystaryna kómek kórsetý úshin barǵan. Birazdan soń úı ıesi urys shyǵarady. Kıim ilgishtegi ilmektiń durys emestigi janjal týyndatqan.

Іshimdik ishken áıel jigittiń qyzymen aradaǵy qarym-qatynasyn quptamaıtynyn da jetkizgen. Daý tóbeleske ulasqan.

Sol kezde aıyptalýshy jábirlenýshiniń oń qolynan ustap, júrek tusyna bir ret pyshaq suqqan.

Búgin túske deıin sottalýshylar sońǵy sózin aıtty. Sottalýshy A.Kóljan:

«Bizdiń qasaqana qylmys jasaǵymyz kelmedi. Sarapshylar bir adamnyń ǵana pyshaq suqqanyn aıtyp otyr. Osyǵan basa nazar aýdarýyńyzdy suraımyn. Biz aldyn ala kelisip, aqyldasyp alǵanymyz joq. Biz tek onyń anasynan alshaqqa ketip, birge bolǵymyz keldi. Ózim onyń ata-ana quqyǵynan aıyrý týraly da oılaǵan edim. Qurmetti sot, Konstıtýtsııada «16 jasqa tolǵan bala ata-anasynyń ruqsatymen otbasy qurýǵa bolady» degen. Qyzdyń anasy qaza bolsa da onyń ókilderinen otbasy qurýǵa ruqsat suraımyn. Men ony qamqorlyǵyma alǵym keledi», - dedi.

Tústen keıin sotta úkim oqyldy.

Sýdıa Altynbek Sabyrov sottalýshy A.Kóljandy Qylmystyq kodekstiń «adam óltirý» baby boıynsha aıypty dep tanyp, 15 jylǵa bas bostandyǵynan aıyrý jazasyn taǵaıyndady.

Al sottalýshy A.Sarına Qylmystyq kodekstiń «adam óltirý» baby boıynsha aıypty dep tanylyp, 9 jylǵa bas bostandyǵynan aıyryldy.

«Úkimmen kelispeımiz. Alǵashynda qyzǵa degen sezimi jeńip, «men» dep aıtyp qoıǵan. Bir ret pyshaq suqtym dedi. Biraq naqtysyn aıta almady. Demek ol emes. Qyz moıyndap tur. Saraptama qorytyndysy eskerilmedi dep esepteımin. Kóp zańsyzdyq boldy. Balama kóp jyl berdi. Ózi mektepti úzdik bitirdi. Bul jerde kinásin ishinara moıyndady», - deıdi sottalýshynyń ákesi Qurmanaly Kóljan.

Aıta keteıik, jalpy mektep esebinde 145, ishki ister organdarynda 15 bala esepte tur. Al qolaısyz 99 otbasynda 145 bala tárbıelenip jatyr.

Bıyl 7 bala qylmys jasady. 2021 jylmen salystyrǵanda 1 balaǵa artyq. Bul derekti qalalyq bilim bóliminiń bas mamany Mıras Turǵambaev aıtty.