Aqtóbede anasyn óltirdi dep aıyptalǵan oqýshy qyzǵa qatysty sot otyrysy bastaldy

AQTÓBE. QazAqparat – Aqtóbe oblystyq qylmystyq ister jónindegi mamandandyrylǵan aýdanaralyq sotynda 16 jastaǵy oqýshy qyz ben onyń 18 jastaǵy jigitine qatysty alǵashqy otyrys ótti. Olarǵa Qylmystyq kodekstiń «Adam óltirý» baby boıynsha aıyp taǵyldy, dep habarlaıdy QazAqparat tilshisi.

«Jábirlenýshi 2022 jyldyń 14 sáýiri kúni saǵat 21:00-den óte qyzynyń jigitin úıine shaqyryp, shaǵyn jóndeý jumystaryn jasap berýdi suraıdy. Jýynatyn bólmedegi burandalardy aýystyrý keregin aıtady. Sol kúni aıyptalýshy jigit saǵat shamamen 23:00-de úı jumystaryna kómek kórsetý úshin barǵan. Birazdan soń úı ıesi urys shyǵarady. Kıim ilgishtegi ilmektiń durys emestigi janjal týyndatqan. Іshimdik ishken áıel jigittiń qyzymen aradaǵy qarym-qatynasyn quptamaıtynyn da jetkizgen. Daý tóbeleske ulasqan. Sol kezde aıyptalýshy jábirlenýshiniń oń qolynan ustap, júrek tusyna bir ret pyshaq suqqan. Munan soń ony býyndyra bastaǵan. Sol kezde janynda turǵan qyzdan kómektesýdi surady. Sebebi, jábirlenýshi ol kezde tiri edi. Qarsylyq kórsetken. Qyz kishkentaı kezinde ózine zábir kórsetken anasyn aıamaı, pyshaqty alyp, birneshe ret suǵyp alady. Sóıtip, múrdeni jasyrýdy oılaıdy», - dedi memlekettik aıyptaýshy sot otyrysy kezinde.

Aıyptaý qorytyndysyna súıensek, ekeýi 19 sáýirge deıin deneni balkonda saqtaıdy. Dene buzylmas úshin oǵan ýksýs quıyp, soda sepken.

«Kináni moıyndaımyn. Biraq, qylmysty ózim jasadym. Ashý ústinde. Qorqyp, eshkimge aıtpadym. Keıin aǵama habarlastym, ol polıtsııa shaqyrdy», - dedi 18 jastaǵy jigit.

Aqtóbe qalasy Almaty aýdandyq prokýratýrasy anasyn óltirgen oqýshy men onyń janynda bolǵan jigitke qatysty isti tergep, sotqa jiberdi. Prokýratýranyń habarlaýynsha, aıyptaý aktisi kezinde olarǵa qatysty bap ózgertildi. Іs Qylmystyq kodekstiń 99-baby 2-tarmaǵy, ıaǵnı top bolyp jasaǵan qylmysy úshin sotqa joldandy.