Aqtóbede anasy men balasyn óz úıinde óltirip ketken

AQTÓBE. QazAqparat – Aqtóbede anasy men balasy kisi qolynan qaza tapty. Al, osy úıdiń 13 jastaǵy qyzy jansaqtaý bóliminde jatyr. Polıtsııa kúdiktini izdestirý jumystaryna kiristi, dep habarlaıdy QazAqparat tilshisi.

Oqıǵa búgin, 29 naýryz kúni boldy. Saǵat 5:30-da «102» telefonyna Aqtóbe qalasyndaǵy turǵyn úıdegi páterlerdiń birinen eki máıit tabylǵany týraly habarlama túsken.

«Jedel tergeý toby páterden 35 jastaǵy áıeldiń jáne 16 jastaǵy ulynyń zorlyq belgileri bar máıitterin tapty. Sonymen qatar, qaza tapqan áıeldiń 13 jastaǵy qyzy pyshaq jaraqatymen balalar aýrýhanasynyń jańsaqtaý bólimine jatqyzyldy. Osy fakti boıynsha Qylmystyq kodekstiń «Kisi óltirý» baby boıynsha sotqa deıingi tergeý bastaldy. Qylmysty jasaǵan adamdardy anyqtaýǵa jáne ustaýǵa baǵyttalǵan arnaıy jáne jedel is-sharalar ótkizilip jatyr. Qylmystyq isti tergep-tekserý sheńberinde ózge de aqparat jarııa etilýge jatpaıdy», - dep habarlady oblystyq PD baspasóz qyzmetiniń jetekshisi Erbolat Sarqulov.

Al, oblystyq densaýlyq saqtaý basqarmasy jaralanǵan qyzǵa ota jasalǵanyn habarlady.

«Qyzǵa ota jasaldy. Ol qazir jansaqtaý bóliminde jatyr. Moıyn tusyndaǵy qan tamyry, keńirdegi kesilip-tesilgen. Jaǵdaıy aýyr», - dedi oblystyq densaýlyq saqtaý basqarmasynyń basshysy Rústem Isaev.