Aqtóbede analarǵa kómek beretin «Baqytty otbasy» ortalyǵy ashyldy

AQTÓBE. QazAqparat - Aqtóbede «Baqytty otbasy» otbasyn qoldaý, aqparattyq-keńes jáne bilim berý ortalyǵy ashyldy, dep habarlaıdy QazAqparat tilshisi.

Kópbalaly, az qamtylǵan, múgedek bala tárbıeleıtin analar endi tegin kýrstarǵa qatysyp, kásipkerlik negizderin úırenedi. Bul - masyldyqtan arylyp, tabys tabýǵa múmkindik beretin joba.

Іs-sharaǵa Aqtóbe oblysynyń ákimi Eraly Toǵjanov, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa múshesi Názıpa Shanaı, kásipker-metsenattar, halyqtyń áleýmettik osal toptary sanatyndaǵy kásibin ashqysy keletin, onyń ishinde «Aýyl amanaty» jobasyna qatysýǵa yntaly áıelder qatysty.

Ortalyq ómirlik qıyn jaǵdaıǵa tap bolǵan nemese onyń týyndaý qaýpi bar otbasylardy anyqtap, olardyń psıhologııalyq, pedagogıkalyq jáne quqyqtyq kómek alýyna múmkindik beretin orynǵa aınalmaq.

Munda bolashaqta óz betinshe aqsha tabýǵa nıetti barlyq aqtóbelik kýrstardy tegin oqı alady.

Kýrsty támamdaǵan soń, qatysýshylarǵa jumysqa ornalasýǵa jáne óz kásibin ashýǵa kómek beriledi.

«Otanǵa degen súıispenshilik otbasynan bastalady. Týǵan shańyraqtan alǵan tárbıe – bul barsha halqymyzdyń baqýatty da tabysty bolashaǵynyń kepili. Otbasyn qoldaý ortalyǵynyń ashylýy – bul óńirdegi otbasylyq-demografııalyq saıasatty iske asyrýdaǵy aýqymdy jumystyń bastamasy ǵana. Bizdiń mindetimiz – ómirlik qıyn jaǵdaıǵa tap bolǵandarǵa kómektesý, olardyń ózderine degen senimin arttyrý, durys baǵytqa baǵyttaý, tek sózben ǵana emes, ispen de qoldaý. Biraq birden aıtaıyn, kómek tek baqytty bolashaǵyna qadam jasaýǵa daıyn adamdarǵa beriledi. Biz masyldyqqa qarsymyz. Mundaı ortalyqtar jaqyn arada Qandyaǵash, Hromtaý qalalarynda, 2025 jylǵa qaraı otbasyn qoldaý ortalyqtaryn oblystyń barlyq aýdandarynda ashý josparda bar» , — dep atap ótti oblys ákimi Eraly Toǵjanov.

Ortalyqta uıymdastyrylǵan alǵashqy sheberlik saǵaty qatysýshylardyń qyzyǵýshylyǵyn týdyrdy.

Sharaǵa arnaıylap Taraz qalasynan kelgen, aqyl-oıdyń kúshi men sheksiz múmkindikterdiń tabysty úlgisine aınalǵan Anar Beksultanovanyń sheberlik saǵaty aqtóbelikterge úlken jiger berdi.

Anar Beksultanova – dúnıege eki qolsyz kelgenine qaramastan, tigin tsehyn ashyp, qyz jasaýyn tigý arqyly tabys taýyp, ózgelerge kásip ashýdyń qyr-syryn úıretip júrgen erekshe qabileti bar adam.

Ulttyq stıldegi biregeı buıymdardy qolónershi eki aıaǵynyń kómegimen tigedi.

«Men bul isti bastaǵanda, tanymal bolamyn dep múlde oılaǵan joqpyn. Jaqynda biz qolónermen aınalysatyn áıelderdiń basyn qosyp, «Sheber shańyraq» qoǵamdyq birlestigin ashtyq. Birlestikte kópbalaly, erekshe balalardy tárbıelep otyrǵan jáne múmkindigi shekteýli analar bar. Men olarǵa memlekettik qoldaý sharalaryn qoldana otyryp, kez-kelgen súıikti isińdi paıdaly iske aınaldyrýǵa bolatyndyǵyn kórsetkim keledi. Bıznes qurý kezinde bastan ótkergen barlyq tájirıbemmen bólisip, ásirese, qoldaýdy qajet etetin áıelderge kómektesip, qaı baǵytta damıtynyn aıtyp, úıretkim keledi. «Baqytty otbasy» sııaqty ortalyqtar óte qajet. Olardyń damýyna óz úlesimdi qosqanyma qýanyshtymyn. Osyndaı qajetti jáne mańyzdy bastamany júzege asyrǵany úshin Eraly Luqpanulyna alǵys aıtamyn», — dedi Anar Beksultanova.

Eki kúnniń ishinde sheberlik saǵattary uıymdastyrylady. Kópbalaly ana, tabysty koých motıvator Altyn Kanıkar áleýmettik jelilerde bıznes júrgizýdi úıretý qupııalarymen bólisedi.

«Egisten sórege deıin» jáne «Balkondaǵy sıyr» jobalarynyń avtory Gúlmaıram Baımaqova aýyldaǵy jeke qosalqy sharýashylyqtardy damytýǵa úıretedi.

«Jalqaý bolýdyń jáne balalaryńyzdy masyldyqqa tárbıeleýdiń qajeti joq. Maǵan senińizder, kóptegen jobalar úlken kapıtaldy qajet etpeıdi. Birden úlken kásip bastaımyn dep shyǵyndalmańyzdar. Aldymen shyǵyny az shaǵyn ispen aınalysý qajet. Kez-kelgen kásipti bastaǵan sátte sátsizdikter, qatelikter bolady. Meniń jobalarym muny dáleldedi. Qazir «Balkondaǵy sıyr» bes qalada júzege asyrylýda. Bul sońy emes», — dep atap ótti Gúlmaıra Baımaqova.