Aqtóbede alǵashqy qar jaýdy

AQTÓBE. QazAqparat – Aqtóbe qalasynda alǵashqy qar jaýdy. Sınoptıkterdiń boljamynsha, qar jáne qar aralas jańbyr jaýýy aldaǵy úsh kúnge sozylady, dep habarlaıdy QazAqparat tilshisi.

«Aqtóbe óńirinde soltústik tsıklonnyń áserinen aýa raıy kúrt ózgerdi. Aımaqtyń ońtústiginde sál jyly bolǵanymen, soltústik bóliginde nólden tómen. Qar, qar aralas jańbyr kútiledi. Sonymen birge, jeldiń jyldamdyǵy sekýndyna 15-20 metr bolady. Úsh kúnde túnde -5 gradýsqa deıin salqyndap, kúndiz +5 gradýs bolady», - dedi ınjener-sınoptık Larısa Tarasenko.

Aqtóbe oblystyq Tótenshe jaǵdaılar departamentiniń bas mamany Álisher Sarbaevtyń aıtýynsha, sınoptıkterdiń málimetine qaraı turǵyndarǵa eskertý jasaldy.

«Túnde úıden shyqpaǵan jón. Jolǵa shyqqanda saqtaný kerek. Sonymen birge, kólikterdiń dóńgelegin aýystyrý mańyzdy», - dedi ol.

Ázirge qandaı da bir tótenshe jaǵdaı tirkelmedi, kómek suraǵan adamdar bolmady. Al, «QazAvtoJol» AQ Aqtóbe oblystyq fılıaly Samara-Shymkent tasjolyn qardan tazartyp, ınertti materıaldar septi.