Aqtóbede alǵash ret bastaýysh partııa uıymdarynyń forýmy ótedi
Tujyrymdama aǵymdaǵy jaǵdaıdy jáne BPU jumysyndaǵy problemalyq máselelerdi taldaýdy, sondaı-aq partııalyq jańǵyrtýdyń negizgi mindetterin eskere otyryp ázirlengen. Qujat BPU jumysyn orta merzimdi ýaqytqa jandandyrý mehanızmin, negizgi maqsattary men mindetterin aıqyndaıdy. Osy Tujyrymdamany tıimdi iske asyrý maqsatynda 2018-2020 jyldarǵa arnalǵan Jol kartasy qabyldanady.
Tujyrymdama jobasynyń mindetteri - BPU qyzmetin, onyń ishinde partııa múshelerimen jumysty jandandyrýdyń nysandary men túrlerin jetildirý, bastaýysh partııa uıymy jáne partııa músheleriniń derekter bazasyn ózektendirý, partııany qoldaýshylar jelisin qalyptastyrý, spıkerler jáne sarapshylar pýlyn qalyptastyrý, BPU jumysyn baǵalaý, ýájdemeleý jáne yntalandyrý júıesin engizý.
Qazirgi kúni Tujyrymdama jobasy osyǵan deıin Ońtústik, Ortalyq, Soltústik-Shyǵys Qazaqstan óńirleriniń 800-ge jýyq bastaýysh partııa uıym basshylarynyń basyn qosqan Shymkent, Qaraǵandy, Pavlodar qalalarynda ótken aımaqtyq forýmdarda talqylanyp, onda engen jańashyldyqtar boıynsha partııalyqtardyń usynystary jınaqtaldy. Endi sońǵy aımaqtyq forým Aqtóbe qalasynda ótti. Elimizdiń ár aımaǵynda partııalyqtar BPU-n jandandyrý boıynsha bergen usynys, tilekteri iriktelip, saraptalyp, jyl sońynda Astanada ótetin respýblıkalyq BPU-nyń forýmynda jarııalanatyn bolady.
Aqtóbe qalasynda ótken forýmǵa Mańǵystaý, Atyraý, Batys Qazaqstan jáne Aqtóbe oblystarynan iri bastaýysh partııa uıymdarynyń tóraǵalary, aýmaqtyq fılıal tóraǵalarynyń birinshi orynbasarlary barlyǵy 200-den astam partııalyqtar qatysty. Aıta ketsek, búginde Batys óńirinde myńnan astam bastaýysh partııa uıymdary bar. Al, respýblıka boıynsha 1 mln. adamdy biriktiretin «Nur Otan» partııasynyń 6 myńǵa jýyq BPU bar.
Búgingi kúni BPU jalpy sanynyń 51,3%-yn (3001 birl.) partııa músheleriniń sany 3-ten 100 adamǵa deıingi, 41,6%-yn (2432) 100-den 500 adamǵa deıingi bastapqy uıymdar quraıdy. Partııa músheleriniń sany 500-den 1000 adamǵa deıingi BPU-nyń úlesi 5,0% (294 birl.) quraıdy. Sany myń adamnan joǵary iri BPU-nyń sany 112 birl. quraıdy, onyń ishinde partııa músheleriniń sany 1 myńnan 3 myń adamǵa deıingi - 103 BPU, 3 myńnan 4 myń adamǵa deıingi - 5 BPU, 4 myń adamnan joǵary - 4 BPU bar.
Aqtóbedegi aımaqtyq forým jumysy 4 sektsııa boıynsha júrgizildi. BPU qyzmetin jandandyrý tujyrymdamasy partııa Hatshysy Tamara Dúısenovanyń qatysymen árbir sektsııada talqylandy.
«Halyqtyń sandyq saýattylyǵyn arttyrýǵa, tsıfrlandyrýǵa, shaǵyn jáne orta bıznesti damytýǵa, «Rýhanı jańǵyrý» jáne memlekettik jastar baǵdarlamasyn júzege asyrýǵa baǵyttalǵan jańa partııalyq jobalardy júzege asyrý joldary men ádisterin talqylaý kútilýde. Sondaı-aq, partııa kadrlyq rezervin qalyptastyrý, elimizdegi jastar saıasatyn odan ári jetildirý, partııanyń taldaý jáne saraptaý áleýetin arttyrý máseleleri keńinen qarastyrylady. Partııa músheleri bastaýysh partııa uıymdarynyń qyzmetin jandandyrý jumysyna qatysty jańa tujyrymda boıynsha pikir almasý, talqylaý bolady», - dedi Tamara Dúısenova.
Tujyrymdama jobasy bastaýysh partııa uıymdarynyń jumys tásilderin qaıta qurýdy qarastyrady. BPU jumysyn jandandyrý úshin qoldanystaǵy kózqarastar qaıta qaralyp, jańa tásilder, baǵyttar qalyptasady. Bul týraly birinshi sektsııada aıtyldy. Sondaı-aq BPU-nyń qyzmetin jandandyrý joldary, partııa jaqtastarymen jumys, spıkerler bazasyn qalyptastyrý, bastaýysh partııa uıymdarynyń qyzmetin baǵalaý, olardy yntalandyrý, bastaýysh partııa uıymdarynyń quqyqtyq bazasyn ózektendirý jumystary talqylandy.
Sondaı-aq qatysýshylar partııanyń barlyq qyzmetin tsıfrlandyrýǵa, partııa músheleriniń biryńǵaı bazasyn quryp, qujat aınalymyn qysqartýǵa jáne partııa qyzmetiniń tıimdiligin arttyrýǵa baǵyttalǵan «Sandyq partııa» jobasymen tanysty.
Ekinshi sektsııada partııa jumysynyń áleýmettik jelidegi tehnologııalary týraly aıtyldy.
Úshinshi sektsııada shaǵyn jáne orta bıznesti damytý, tsıfrlandyrý, «Rýhanı jańǵyrý» sheńberindegi partııalyq jobalardy iske asyrý tásilderi, spıkerlermen jumys jasaý mexanızimderi talqylandy.
«Elbasy, partııa tóraǵasy Nursultan Ábishuly Nazarbaev partııamyzdyń túrlený jóninde jańǵyrý máselesin qoıǵan bolatyn. Sondyqtan bizdiń búgingi kezdesýimiz partııamyzdyń júıeli jańǵyrýyna baılanysty bolyp otyr. Jańa jobalar - birkúndik aktsııa nemese keńselik sharalar emes, partııa músheleriniń eńbegi, nátıjesinde qazaqstandyqtardyń ómiri men turmysy jaqsarýy tıis», - dep atap ótti «Nur Otan» partııasynyń Hatshysy Tamara Dúısenova.
Tórtinshi sektsııanyń jumysy partııalyq kadrlar rezervin qalyptastyrý máselelerine arnaldy. Onda partııalyq kadrlyq rezerv qalyptastyrýdyń maqsaty jáne negizi qaǵıdalary túsindirildi. Sodan soń partııalyq oqytýdyń júıesi týraly aıtyldy.
Sonymen qatar, Partııa Ortalyq apparaty qurylymdyq bólimderiniń basshylary, saıası menedjment akademııasynyń oqytýshylary, tanymal trenerler jáne saıasattanýshylar bastaýysh partııa uıymy tóraǵalaryna trenıngter ótkizdi.
Forýmnyń ekinshi kúni oblys ákimi, «Nur Otan» partııasy Aqtóbe oblystyq fılıalynyń tóraǵasy Berdibek Saparbaevtyń qatysymen plenarlyq otyrys ótedi. Partııalyqtar bastaýysh partııa uıymdarynyń belsendiligin arttyrý boıynsha óz usynystaryn jetkizedi.