Aqtóbede alǵash ret aýyl balalaryna onlaın sabaq beretin joba bastaldy
Aqtóbe oblysynda shaǵyn jınaqty aýyl mektepterindegi bilim sapasyn arttyrýǵa baǵyttalǵan mańyzdy joba bastaý aldy. Sharaǵa oblys ákimi Eraly Toǵjanov, pedagogter men shaǵyn jınaqty mektep dırektorlary, memlekettik mekeme basshylary qatysty.
«Memleket basshysynyń qoldaýymen Qazaqstanda balalardyń jan-jaqty damýy men sapaly bilim alýyna barlyq jaǵdaı jasalǵan. Degenmen jasyratyny joq, qala men aýyl mektepteriniń bilim sapasyndaǵy alshaqtyqqa áser etetin faktorlar bar. Osy máselelerdi sheshý úshin birqatar shara qabyldanyp jatyr. Búgingi kúni 114 mektepke kabınet jabdyqtaý, mektep jıhazyn jańartý, onyń ishinde kitaphanalary men ashanalaryn jańartý boıynsha jumys júrgizilip jatyr. 2025 jylǵa deıin 282 mektep jańǵyrtylady. Aýyl balalarynyń bilim sapasyn arttyrýda búgin óz bastaýyn alyp jatqan «Bilim ALL» óńirlik jobasynyń oń áserin tıgizetinine senimdimin», — dedi oblys ákimi Eraly Toǵjanlv
Oblystaǵy 424 mekteptiń 66% nemese 281-i aýyldyq jerlerde ornalasqan. Onyń 204-i – shaǵyn jınaqty. «Bilim ALL» jobasy 10575 oqýshysy bar 120 shaǵyn jınaqty mektepti qamtıdy. Buryn atalǵan mektepterdiń bilim kórsetkishi tómen bolatyn. Basty sebep — bilikti mamandardyń tapshylyǵy men materıaldyq-tehnıkalyq bazanyń álsizdigi.
«Alǵa aýdanyndaǵy 29 mekteptiń 13-i shaǵyn jınaqty. Máselen bizdiń mektepte 58 bala oqıdy. Bul joba bilikti pedagogterden jaqsy bilim alýǵa, al aýyl muǵalimderi úshin úlken tájirıbe jınaqtaýǵa jáne biliktiligin arttyrýǵa tamasha múmkindik», - dep atap ótti Alǵa aýdanynyń Qaraqobda mektep-balabaqshasynyń dırektory Erkinbek Zııadınov.
Úzdik nátıjelerge qol jetkizgen, joǵary sapaly bilim kórsetken 25 muǵalimi balalardy oqytady. Olardyń qatarynda Daryndy jasóspirimderge arnalǵan «Bilim-ınnovatsııa» mamandandyrylǵan lıtseı-ınternaty, M.Qusaıynov atyndaǵy daryndy balalarǵa arnalǵan mamandandyrylǵan lıtseı-ınternaty, mamandandyrylǵan fızıka-matematıkalyq lıtseı-ınternaty jáne taǵy da basqa bilim ordalary bar. Matematıka, fızıka, hımııa, bıologııa, aǵylshyn tili pánderiniń muǵalimderi onlaın-sabaqtar ótkizedi.
«Qala men aýyldaǵy bilim deńgeıin teńestirý maqsatynda qolǵa alynyp jatqan jobanyń qatysýshysy bolý — biz úshin úlken mártebe. Daryndy balalar aýylda da bar. Biraq maman tapshylyǵynyń kesirinen olardyń barlyǵyn der kezinde tanı almaı jatamyz. Aldaǵy ýaqytta bul jobanyń aýqymy keńeıetinine senimim mol», — dedi M.Qusaıynov atyndaǵy daryndy balalarǵa arnalǵan mamandandyrylǵan lıtseı-ınternatynyń matematıka pániniń muǵalimi, «Aqtóbe oblysynyń úzdik pedagogi» Nurbek Abdýllın.