Aqtóbede alǵash ret ákeler baıqaýy uıymdastyryldy

AQTÓBE. QazAqparat - Aqtóbede alǵash ret «Meniń ákem» áleýmettik jobasy uıymdastyryldy. Jobaǵa 25 jas pen 90 jas aralyǵyndaǵy meıirimdi, batyr, qamqor ákeler qatysyp jatyr, dep habarlaıdy QazAqparat tilshisi.

Aqtóbede «Meniń ákem» áleýmettik jobasy iske asyrylyp jatyr. Barlyǵy 8 nomınatsııa boıynsha 116 otbasydan ótinish qabyldandy. Máselen, «Batyr áke» nomınatsııasynyń talaby boıynsha 8 balany tárbıelegen otaǵasy ǵana qatysa alady. Bul atalymǵa 10 bala tárbıelep, ósirgen 90 jastaǵy Seıit Sútemgenov baq synap jatyr. Úmitkerler qatarynda 40 jasynda 10 bala tárbıelep otyrǵan Serikbaı Ordabaıuly da bar. Al múgedek balasyn baǵyp otyrǵan ákeler úshin «Meıirimdi áke» nomınıtsııasy qarastyryldy. Úsh qyz ósirip, tárbıelep otyrǵan ákeler «Hanshaıymdardyń ákesi» atalymyna qatysyp jatyr.

«Analar, arýlar merekesi ataýsyz qalmaıdy. Al ákeler úshin Otan qorǵaýshylar kúniniń mańyzy zor. Sebebi, Otandy qorǵaý otbasynan bastalady. Al otbasynyń beriktigi ákege baılanysty. Áke bedelin arttyrý, qurmetteý maqsatynda «Meniń ákem» áleýmettik jobasy qolǵa alyndy. Biz Aqtóbede myqty er azamattar bar ekenin, olar balasy úshin eń jaqsy áke ekenin jetkizgimiz keldi. Jobaǵa oblystaǵy aýdandardan ótinish tústi. Tipti, Atyraý, Mańǵystaý, Batys Qazaqstan, Qyzylorda oblystary qyzyǵýshylyq bildirdi. Jańa jobaǵa tek oblys turǵyndary qatysyp otyr. Bizge depýtattar, kásipkerler, ákesin qurmet tutatyn adamdar demeýshilik bildirdi», - dedi ıdeıa avtory Jańalyq Ahash.

«Meniń ákem» áleýmettik jobasyna barlyǵy 200-den astam ótinish tústi. Onyń teń jartysy ǵana baıqaý talaptaryn oryndap, der kezinde hat joldap úlgergen. Qazirgi kezde baıqaýǵa qatysyp jatqan ákelerdiń eń jasy 25-te, úlkeni 90 jasta.

«Bizde balasy úshin bar kúsh-jigerin arnap, múgedek sábıin emdetýge shetelge shyǵyp júrgen ákeler de bar. Sonymen qatar, jalǵyzbasty ákelerdiń de ul men qyzyn ózi baǵyp-qaǵyp otyr. Joba kezinde muǵalimder men dárigerlerge, quqyq qorǵaýshylarǵa, óner adamdaryna arnalǵan nomınatsııa qarastyryldy. Balasyn bilim men sport, óner saıystaryna qatystyryp, jeńimpaz tárbıelegen ákeler de ataýsyz qalmaıdy. Áleýmettik jobasy qolǵa alǵan kezde ulttyq salt-dástúrimizdi umyt qaldyrmadyq. Biz ákelerge aqshalaı syı beremiz ári qamshy syılaımyz. Ár qazaqtyń úıinde, tórinde qamshy ilýli turýy shart»,- dedi Jańalyq Ahash.

Aıta keteıik, «Meniń ákem» jobasy kezinde áke týraly án aıtylyp, teatrlandyrylǵan kórinis usynylady.