Aqtóbede alaıaqtyǵy úshin sottalǵan eks-ákim bosap shyqty

AQTÓBE. QazAqparat – Aqtóbe oblystyq qylmys ister jónindegi sot alqasynyń qaýlysymen №2 Aqtóbe qalalyq sotynyń úkimi ózgertildi. Qylmystyq kodekstiń «Alaıaqtyq» baby boıynsha sottalyp, bas bostandyǵynan aırylǵan Almaty aýdanynyń burynǵy ákimi Abat Kóbenov túrmeden bosap shyqty, dep habarlaıdy QazAqparat tilshisi.

№2 Aqtóbe qalalyq soty Abat Kóbenovti Qylmystyq kodekstiń «Alaıaqtyq» baby boıynsha aıypty dep tanyp, úsh jylǵa bas bostandyǵynan aıyrǵan bolatyn. Іs materıaly boıynsha ol 2020 jyly qyzmettik ókilettiligin asyra paıdalanyp, tanysyna jer telimin berýge ýáde etken. Sol qyzmeti úshin odan 1 383 915 teńge aqy alǵan. Sot úkimimen A. Kóbenov úsh jylǵa bas bostandyǵynan aıryldy. Ol ómir boıy memlekettik qyzmette eńbek ete almaıtyny týraly úkim shyǵaryldy.

«Іske qatysty appelıatsııalyq shaǵym tústi. Appelıatsııalyq sot otyrysy kezinde prokýror A. Kóbenovke qatysty úkimdi ózgertip, aıyppul túrindegi jaza taǵaıyndaýdy surady. Appelıatsııalyq sot otyrysy kezinde de Abat Kóbenov aıypty dep tanyldy. Óz isine ókinip, aqshany túgel qaıtarǵanyn aıtty. Onyń úsh balasy men kári anasy bar. Sot alqasy osyny eskerip, Abat Kóbenovke qatysty bas bostandyǵynan aıyrý jazasyn alyp tastady», - dep habarlady Aqtóbe oblystyq sotynyń baspasóz qyzmeti.

Endi A. Kóbenov 13 mln teńgeden astam aıyppul tóleıdi. Appelıatsııalyq qaýly zańdy kúshine endi.