Aqtóbede alaıaqqa sengen turǵyn 19 mln teńgesinen aıyryldy
Polisia.kz saıtynyń málimetinshe, shilde aıynda Aqtóbe qalasyndaǵy mekemelerdiń biriniń basshysy telefon-alaıaqtarynyń arbaýyna túsip, 19 mıllıon teńgege qaryzǵa kirgen.
Aqtóbelik áıeldiń telefonyna belgisiz adamdar WhatsApp messendjeri arqyly habarlasyp, ózderin Ulttyq qaýipsizdik komıtetiniń, Ulttyq banktiń jáne polıtsııa departamentiniń qyzmetkerleri retinde tanystyrǵan. Qońyraý shalýshylar jábirlenýshige onyń atyna alaıaqtar túrli bankterden 10 onlaın-nesıe rásimdelgenin jáne olardyń kúshin joıý úshin óz atyna birneshe nesıe rásimdeý qajettigin aıtqan.
Áıel qońyraý shalýshylardyń barlyq shartyn oryndap, qaladaǵy 3 bankten óz atyna 14 mıllıon teńgege jýyq somaǵa nesıe rásimdegen. Sonymen qatar jaqyn týystarynan 5 jarym mıllıon teńge qaryz alǵan. Ári qaraı jalpy somasy 19 mıllıon teńgeden asatyn aqshany alaıaqtar kórsetken banktik shottarǵa aýdarǵan. Eki kúnnen keıin ǵana alaıaqtarǵa aldanyp, qaryzǵa batqanyn túsingen jábirlenýshi polıtsııaǵa aryzdandy.
– Quzyrly mekeme qyzmetkerleri WhatsApp messendjeri arqyly qońyraý shalmaıtynyn, jeke derekterińizdi jáne telefonǵa eshqandaı qosymsha baǵdarlamalar júkteýdi suramaıtynyn jáne óz attaryńyzǵa nesıe rásimdep, aýdaryp jiberýdi talap etpeıtinin azamattardyń taǵy da esine salamyz, - dedi Aqtóbe oblysy PD kıberpol bóliminiń basshysy Galına Styrlıchýk.
Eske sala keteıik, buǵan deıin eki apta ishinde ІІM jedel bólinisteri izdeýde júrgen 117 qylmyskerdi ustap, habar-osharsyz ketken 98 adamnyń ornalasqan jerin anyqtaǵanyn jazǵan edik.