Aqtóbe qalasynda búgin bas shyrsha jaǵyldy. «Tórlet, qutty Jańa jyl» keshinde Aqqalalar festıvali uıymdastyryldy. Onda balabaqsha, mektep, túrli mádenıet úıinen 100-den astam ótinish berilip, qatysýshylar kıim úlgisin kórsetti.
- Aqqalany jasaý úshin mata, paralon paıdalandym. Oǵan tórt kún qajet boldy. Aldymen oqýshym Nazym Nursultan ekeýimiz úlgisin tańdap, keıin óz qolymmen ólshemin alyp, syzyp, tigip shyqtym. Aqqalanyń kıimin birinshi ret tigip turmyn. Kıim óte sátti shyqty ári naǵyz aqqala boldy,- dedi «Smart Bilim» mektebiniń muǵalimi Ásel Tatıbaeva.
Aqqalalar festıvaline qatystandardyń eń kishkentaıy 3 jasta bolsa, úlkeni mádenıet salasynyń qyzmetkerleri. Talap boıynsha festıvalge qatysýshylardyń tyń ıdeıasy eskerildi.
- Eshkim júldesiz qalmady. Ár qatysýshyǵa syılyq berildi, al úzdikterine alǵys hat pen qarjylaı syı úlestirdik. Mektep, balabaqsha ujymdary belsendi boldy ári qyzyǵýshylyq joǵary,- dedi Aqtóbe qalasy mádenıet jáne tilderdi damytý bóliminiń basshysy Gúljaına Bısenǵalıeva.
Aıta keteıik, Aqtóbe qalalyq ákimdigi bıyl shyrsha ornatý, bezendirý jumystaryna bıýdjetten qarjy bólmedi. Buǵan deıin habarlaǵanymyzdaı, keshe Óskemende shyrsha jaǵylyp, Aıaz atalar sherýi ótti.