Aqtóbede adamdardy bopsalap kelgen eki kúdikti ustaldy
Aqtóbe oblystyq Polıtsııa departamenti baspasóz qyzmetiniń málimetinshe, eki turǵyn aryz jazyp, eki adam ózderinen aqsha bopsalaǵany týraly aıtqan. Buǵan deıin olar 1,7 mln teńgesinen aıyrylsa, keıin qaskóıler taǵy 1,5 mln teńge talap etken.
«Polıtsııa qyzmetkerleri jedel izdestirý sharalaryn júrgizý barysynda 29-30 jastaǵy eki kúdiktini ustady. Tintý kezinde olardan aqsha tabyldy. Qylmystyq kodekstiń «Qorqytyp alý» baby boıynsha sotqa deıingi tergeý amaldary júrgizilip jatyr. Kúdiktilerge «qamaýǵa alý» bultarpaý sharasy qoldanyldy», - dedi oblystyq PD baspasóz qyzmetiniń jetekshisi Erbolat Sarqulov.
Osy baptyń sanktsııasymen múlkin tárkileý, úsh jyldan jeti jylǵa deıin bas bostandyǵyn shekteý, ne sol merzimge bas bostandyǵynan aıyrý jazasy kózdelegen.
Aıta keteıik, Aqtóbede alaıaqqa aldanǵandar da aryz jazyp jatyr. Hromtaý qalasynyń turǵyny 10 mln teńgesinen qaǵyldy. Áıeldiń uıaly telefonyna beıtanys adam habarlasyp, ózin bank qyzmetkerimin dep tanystyrǵan. Senimine kirgen alaıaq áıelden SMS habarlama kodyn alyp, úsh bank shotyndaǵy jalpy somasy 10 mln teńgege jýyq aqshasyn jymqyrǵan.