Aqtóbede «A» klasty kólik-logıstıka ortalyǵy salynady
«Biz «Qazaqstan temir joly» Ulttyq kompanııasymen «A» klasty kólik-logıstıka ortalyǵyn salý jóninde kelisimge keldik. Ortalyqtyń aýdany shamamen 60 myń sharshy metrdi quraıdy jáne jylyna 1 mln tonnaǵa jýyq júk tasymaldaý múmkindigi týady. Ekonomıkanyń ósýin jańa kapıtal salymynsyz, jumys oryndarynsyz jáne eńbek ónimdiligin arttyrmaı júzege asyrý múmkin emes. Árıne, bul jerde ınvestıtsııa quıý mańyzdy. Sońǵy 5 jylda aımaq ekonomıkasyna 6 mlrd AQSh dollarynan astam qarajat tartyldy. Investıtsııalardyń 25% tikeleı shetelden tartyldy. Búginde Aqtóbe oblysynda 1,5 myńǵa jýyq sheteldik kásiporyn jumys isteıdi. Bul bıznes tarapynan bizdiń óńirge degen joǵary senimniń belgisi», - dedi Eraly Toǵjanov elordada ótip jatqan «Aktobe Investment-2022» VII halyqaralyq ınvestıtsııa forýmynda.
Oblys basshysynyń málimetinshe, bıyl Aqtóbeden 2,3 mlrd AQSh dollaryn quraıtyn ónim eksporttaldy. Syrtqy taýar aınalymy 55,7% artyp, 3,2 mlrd dollarǵa jetti.
Sondaı-aq óńir ákimi jahandyq ınvestıtsııa taqyrybynda ótken «dóńgelek ústel» barysynda ınvestorlarmen 735 mln AQSh dollaryn quraıtyn 5 memorandýmǵa qol qoıdy.
«Otandyq ýrbanıstıkanyń jetekshi sarapshylarymen birlesip, Aqtóbe qalasyna jańa sáýlettik kelbet pen estetıkalyq kórinis berý úshin jańǵyrtý jáne abattandyrý boıynsha jobalar iske asyrylyp jatyr. Jalpy qala kelbetin qalyptastyrýda biryńǵaı keshen jáne dızaın kodqa sáıkes jumys isteý kerek. Osy oraıda Elek ózeniniń jaǵalaýyn eko-saıabaq retinde abattandyrý jumysyna toqtalǵym keledi. Saıabaq aýmaǵynda bir sátte 70 myń adamǵa deıin demalý múmkindigi bar. Bul – qalaǵa týrısterdi tartýdyń bir amaly. Taǵy bir mańyzdy nysan S. Jıenbaev atyndaǵy oblystyq jasóspirimder kitaphanasy bazasynda «Art and Science» zııatkerlik ortalyǵyn qurý. Halyqaralyq standartqa sáıkes keletin tolyqqandy jańartylǵan kitaphana qory jylyna birneshe myń adam keletin bilim alý ortalyǵyna aınalady», - deıdi E. Toǵjanov.
Aıta ketsek, Astanada «Aktobe Investment-2022» VII halyqaralyq ınvestıtsııa forýmy ótip jatyr.
Atalǵan shara barysynda Aqtóbe oblysynyń bıznesti júrgizýdegi artyqshylyqtary, ınvestıtsııa quıýǵa perspektıvaly salalar men jobalar tanystyrylýda.
Forýmǵa birneshe mınıstrlik ókilderi, ulttyq kompanııalar, qarjylyq ınstıtýttar, transulttyq kompanııalardyń basshylary jáne otandyq, sheteldik ınvestorlar qatysyp jatyr.