Aqtóbede 7 jasar tennısshi shıraq qımylymen kópti tánti etti

<p>AQTÓBE. KAZINFORM &ndash; Aqtóbelik tennısshi Medına Amandyqtyń tennıs oınaǵan sáti áleýmettik jelige tarap, oqýshy birden tanymal boldy. Qurshasaı orta mektebinde bilim alatyn kishkentaı sportshy qazirgi kezde aptasyna alty kún jattyǵyp júr.</p>

Qurshasaı turǵyn alabyndaǵy № 77 orta mekteptiń 2-synyp oqýshysyn dene shynyqtyrý pániniń muǵalimi Muhıt Ábdiǵalıev jattyqtyrady.

Medına Amandyq 5 jasynan bastap tennıs úıirmesine qatysyp júr.

Qolǵa raketka ustaý, dopty qaǵyp alý, qarsylastyń osal tusyn bilip, ony basyp ozý erejesin sheber meńgergen. 

Qımyly shıraq oqýshy aptasyna 6 kún jattyǵyp júr.

— Medınanyń ata-anasy balanyń sportqa beıim ekenin bilip, jattyǵýdan qaltyrmaıdy. Mektepte, sonymen birge árbir senbi saıyn qalalyq ústel tennısi sport mektebinde jattyǵady. Eki úıirmege tolyq barady. Qazir sheberligi shyńdalyp, qalalyq qana emes, oblystyq jarystarǵa da qatysyp júr. 2009 jylǵy jáne odan kishi jastaǵy sportshylar arasynda ótken jarysqa qatysyp, fınalǵa jetti. Sáýir aıynda 2013 jyly týǵan sportshylar arasynda jarys ótedi. Soǵan qatysyp, baq synaıdy. Ol oń jaqtan urý, sol jaqtan urý, kesý, dopty aınaldyrý tásilderin jaqsy meńgergen, — dedi Muhıt Ábdiǵalıev. 

Medına Amandyq — oqý ozaty. Synyp jetekshisi Bıbijamal Qurman onyń matematıkada esepti shapshań shyǵaratynyn, qazaq tilin de súıip oqıtynyn aıtyp berdi.

Túske deıin oqıtyn ol sabaqqa únemi daıyndalyp keledi. 

— Medınaǵa birinshi synyptan bastap sabaq beremin. Óte talantty bala. Sabaqty óte jaqsy oqıdy, tennıske de qatysady. Sýret salǵandy da unatady. Ol aldaǵy ýaqytta ústel tennısinen chempıon bolǵysy keletinin aıtyp otyrady. Ózime kómekshi, ári synyp belsendisi, — dedi ustazy.