Aqtóbede 58 ata-anaǵa aıyppul salyndy

<p>AQTÓBE. KAZINFORM &ndash; Aqtóbede birinshi jartyjyldyqta moped, skýter, mototsıkldiń qatysýymen 100-den astam jol-kólik oqıǵasy boldy. Saldarynan bir adam qaza tapqan. Al aıyppul turaǵyna barlyǵy 300-den astam eki dóńgelekti kólik jetkizilgen.</p>

Aqtóbe oblysynda qazir polıtsııa qyzmetkerleri moped, skýter, mototsıkl sekildi eki dóńgelekti kólik ıelerine túsindirý jumysyn júrgizip jatyr. Sebebi jyl basynan beri motokólikterdiń qatysýymen 134 kólik oqıǵasy tirkeldi. Saldarynan 1 adam qaza taýyp, 16 adam ártúrli dárejedegi jaraqat aldy. Arasynda kámeletke tolmaǵan 3 bala bar.

«16 jasqa tolmaǵan balalardyń moped aıdap júrgeni anyqtalsa, kólikti aıyp turaǵyna ákelemiz. Keıin ata-anasyna habarlasamyz. Ár adam ártúrli. Ony túsinetinder de, kerisinshe qarsy shyǵatyndar da bar. Ákimshilik quqyqbuzýshylyq týraly kodekstiń «Kámeletke tolmaǵan adamdy tárbıeleý jáne (nemese) oǵan bilim berý, onyń quqyqtaryn jáne (nemese) múddelerin qorǵaý jónindegi mindetterdi, qaýipsizdigin qamtamasyz etý jónindegi sharalardy oryndamaý» baby boıynsha aıyp taǵylady. Bıyl 58 ata-anaǵa aıyppul salyndy», - dedi Aqtóbe qalalyq PB bastyǵy Áset Qalıev. Ákimshilik quqyqbuzýshylyq týraly kodekstiń 127-babyna súıensek, balasynyń qaýipsizdigin qamtamasyz etpegen ata-anaǵa 10, 15, 20 AEK kóliminde aıyppul qarastyrylǵan.

Aıta keteıik, jyl basynan beri aıyp turaǵyna 324 motokólik jetkizildi. Qazirgi kúni 58 eki dóńgelekti kólik sol kúıi ıesine berilmedi. Kóbi kámelet jasqa tolmaǵandar aıdaǵan skýter, moped. 

Foto: Aqtóbe oblystyq PD

«Jasym 17-de. Men moped aıdap júrip, adam qaǵyp kettim. Mas kúıinde júrgen adam jolǵa shyǵyp ketti. Búgin kelip, aıyppulyn tólep, alyp ketemiz. Endi mundaı kólik aıdamaımyn», - dedi aqtóbelik Arystan.

Qazirgi kezde oblys ortalyǵynyń aýmaǵynda «Qaýipsiz jol» jedel profılaktıkalyq is-sharasy ótkizilip jatyr. Shara kezinde skýter, moped aıdap júrgen jasóspirimderge basymdyq beriledi. Polıtsııa aqtóbelik eresekterge balalaryna arnap moped satyp alyp bermeýge shaqyrdy.