Aqtóbede 540 úleskerdiń máselesi ınvestorlardyń kómegimen sheshiletin boldy
Aqtóbe qalasy boıynsha 540 úlesker 11 turǵyn úı keshenine qarjy aýdarǵan. Kóbinde qurylys jumysy birneshe jyl boıy toqtap tur. Qarjy tapshylyǵy, qurylys materıalynyń baǵasy, sot protsesteri jáne ózge de faktorlar keri áserin tıgizdi. Problemalyq nysandardy tez arada paıdalanýǵa berý jáne qıyn jaǵdaıǵa tap bolǵan úleskerlerdi turǵyn úımen qamtamasyz etýge kómektesý úshin Aqtóbe oblysynyń ákimi Eraly Toǵjanovtyń tapsyrmasymen keshendi sharalar qabyldanyp, Qurylys kooperatıvterdiń problemalyq máselelerin sheshý jónindegi jol kartasy bekitildi.
Oblys ákimi Aqtóbedegi qurylysy uzaqqa sozylǵan turǵyn úı keshenderin aralap, buǵan deıin berilgen tapsyrmalardyń oryndalý barysyn jeke ózi tekserdi. Barlyq 11 nysandy aıaqtaý úshin áleýetti ınvestorlar anyqtaldy. Keıbir merdigerlerge katysty materıaldar quqyq qorǵaý organdaryna jiberildi. Qazirgi tańda barlyq nysanda qurylys jumystary bastaldy.
Atap aıtqanda, Safına turǵyn úı kesheniniń qurylys alańynda jumystar 2020 jyly toqtatylǵan. Sebep – qurylys materıaldarynyń qymbattaýy. Mundaǵy páterlerdiń 75%-y satylǵan. Biraq, turǵyndar áli kúnge deıin baspanasyna kire almaı otyr.
4 qazanda oblys ákimdiginde ótken jıynnan keıin merdiger kompanııa qurylys-montaj jumystaryn jandandyrǵan jáne jyl sońyna deıin aıaqtaýǵa ýáde berip otyr. Nysan tolyǵymen keler jyldyń kókteminde paıdalanýǵa beriledi.
Sondaı-aq óńir basshysy «Kaspigroup», «Alash Orda», «Jılışe», «Janǵalı», «Exclusive» turǵyn úı keshenderinde bolyp, qurylys barysymen tanysyp, úleskerlermen kezdesti. Jobadan aýytqyp, qurylys materıaldaryn aýystyrǵan «Jılışe» turǵyn úı kesheni súriledi.
«Problemalyq nysandardyń qatarynda 2016 jyldan bergi jobalar bar. Qurylysshylar turǵyndardan toǵyzqabatty úıdiń qurylysyna aqsha alyp, úıdiń tórt qabatyn ǵana salǵan. Qalǵan qarajatqa jer ýchaskelerin satyp alyp, múldem joq páterlerdi satyp úlgergen. Sharalar qabyldaýǵa týra keldi. Al basqa kompanııalarǵa qatysty naqty mindetter qoıyldy: olar qurylysty tolyqqandy aıaqtaıdy nemese óz mindetin ýaqytyly ári sapaly oryndaıtyn ınvestorlarǵa tapsyrady. Biz qoıǵan talaptardy oryndap, isti sońyna deıin jetkizýge daıyn áleýetti ınvestorlardy anyqtadyq. Endigi is qurylysshylarǵa baılanysty. Óz kezeginde, biz qajetti kómek kórsetýge daıynbyz. 2023 jyldyń sońyna deıin úleskerlerge qatysty máselelerdi sheshetin bolamyz», - degen oblys ákimi qurylysshylarǵa óz mindettemelerin sapaly ári ýaqytyly oryndaýdy tapsyrdy.