Aqtóbede 5 oqýshy otyrǵan kólik apatqa ushyrap, bireýi qaza tapty

AQTÓBE. QazAqparat - Aqtóbede oqýshylar jol-kólik apatyna tústi. Bireýi kóz jumyp, tórteýi aýrýhanaǵa jatqyzyldy, dep habarlaıdy QazAqparat tilshisi.

4 naýryz kúni saǵat 20:55-te Shalqar-Bozoı tasjolynda jol apaty boldy. Kámeletke tolmaǵan bala Toyota Land Cruiser avtokóliginiń rýline ıe bola almaı, aýdaryldy.

«Saldarynan bir bala oqıǵa ornynda qaza bolyp, al tórteýi aýrýhanaǵa tústi. Ata-analar, ár balanyń ómiri qymbat ekenin eskerip, kólikti balalarǵa bermeýdi suraımyz»,- dedi aýdandyq polıtsııa bólimi bastyǵynyń orynbasary Narıman Muhtarov.

Aqtóbe oblystyq densaýlyq saqtaý basqarmasy basshysynyń orynbasary Bekbolat Іzbasarovtyń aıtýynsha, 2007 jyly týǵan qyz aýrýhanaǵa es-túzsiz jetkizildi. Ol ashyq bas-mı jaraqatyn alǵan. Mıyna qan quıylǵan. Dáriger jaǵdaıy óte aýyr dep otyr.

«2008 jyly týǵan eki balanyń da aıaǵy synǵan. Ekeýi de oblystyq balalar aýrýhanasyna jiberildi. Al bir bala jeńil jaralanyp, ambýlatorııalyq baqylaýǵa alyndy»,- dep habarlady Bekbolat Іzbasarov.

Eske salsaq, 4 naýryz kúni Soltústik aınalma jolda KamAZ júk kóligi men Cobalt jeńil avtokóligi soqtyǵysqan. Jeńil avtokóliktiń júrgizýshisi men úsh jolaýshysy – barlyǵy Ózbekstan Respýblıkasynyń azamattary oqıǵa ornynda kóz jumdy. Sotqa deıingi tergeý bastaldy jáne oqıǵanyń mán-jaıy anyqtalyp jatyr.