Aqtóbede «5-10-20» baǵdarlamasy boıynsha alǵashqy adam baspana aldy

AQTÓBE. QazAqparat - Aqtóbede «Shańyraq» baǵdarlamasy aıasynda alǵashqy klıent óz páteriniń kiltin aldy, dep habarlaıdy QazAqparat tilshisi.

Aqtóbe qalasynyń turǵyny Janar Jeksenbaeva 11 jyl buryn bıýdjettik sala qyzmetkeri retinde páter kezegine turǵan. Mamandyǵy – dáriger. Qazirgi kúni bala kútimi boıynsha demalysta otyr.

«Zhilstroy_aktobe ınsta paraqshasyna tirkelip, jańalyqtaryn únemi qarap otyramyn. Kúnde tikeleı efırde onlaın keńes beredi. Qosyp, tyńdap júremin. Birde «5-10-20 baǵdarlamasy bastaldy« degendi qulaǵym shalyp, efırde suraq qoıdym. Ótinim berý jolyn sol sátte kórsetti. Efırden soń saıt arqyly ótinim berdim. SMS habarlama keldi. Kelesi kúni áleýmettik jelidegi paraqsha arqyly kelesi satysyn suradym. Bank mamany taǵy tolyq aqparat berip, 3 kúnde qaıta habarlasatynyn aıtty. Sóıtip bankke tek jeke kýáligimmen baryp, 10 mınýt ishinde maquldama aldym. Tizim boıynsha páterlerdi qaradym. Tańdap, kiltin alyp, qýanyp otyrǵan jaıymyz bar», - deıdi Janar Jeksenbaeva.

Eske sala ketsek, «Shańyraq» baǵdarlamasy boıynsha 2010 jylǵa deıin páter kezegine turǵan azamattardan ótinim qabyldaý 17-tamyzda bastaldy.

Aqtóbe óńiri boıynsha 500-ge jýyq úmitker hcsbk.kz saıty arqyly ótinim berdi. 43 adam qujat tapsyryp, 38 adam maquldama aldy.