Aqtóbede 4 jyl boıy bótenniń tárbıesinde bolǵan búldirshin anasymen qaýyshty
Aqtóbe qalasynyń kishkentaı turǵyny 4 jyl boıy bala kútýshisi Marıanna Foteksýdyń tárbıesinde boldy. Buǵan deıin habarlaǵanymyzdaı, qalalyq qorǵanshylyq jáne qamqorshylyq organy izdeý jarııalap, anasy Astana qalasynan tabylǵan bolatyn. Bala dereý «Aıala» ómirlik qıyn jaǵdaıǵa tap bolǵan balalardy qorǵaý ortalyǵyna jatqyzylyp, qala ákimdigi janyndaǵy kámeletke tolmaǵandardyń isi jáne olardyń quqyqtaryn qorǵaý jónindegi komıssııa otyrysyn, sheshimin kútti.
«Qala ákimdigi janyndaǵy kámeletke tolmaǵandardyń isi jáne olardyń quqyqtaryn qorǵaý jónindegi komıssııa búldirshindi anasyna berýge biraýyzdan sheshim qabyldady. Sonymen qatar, Astana qalasynyń qorǵanshylyq jáne qamqorshylyq organyna ata-analyq mindetti durys atqarmaǵany úshin ákimshilik jaýapkershilikke tartý, anasyn baqylaýǵa alý týraly usynys berdi», - dedi Aqtóbe qalalyq bilim bóliminiń sektor meńgerýshisi Aǵyrys Shaǵyrova.