Aqtóbede 38 myń adamnyń eńbekaqysy kóbeıedi - Berdibek Saparbaev

AQTÓBE. QazAqparat - Aqtóbe oblysynyń ákimi Berdibek Saparbaev óńir aktıvimen kezdesip, Elbasy Joldaýyndaǵy tapsyrmalar boıynsha atqarylatyn jumysty pysyqtady, dep habarlaıdy QazAqparat tilshisi.

Aqtóbe oblysy bıyl ekonomıkalyq damýdyń 5 paıyzdyq ósimin saqtap qalady. Al jalaqynyń ósimi 109 paıyzdy qurady. Ákimdik pen kásiporyndar arasyndaǵy memorandým aıasynda iri, shaǵyn, orta kásipkerlik ıeleri óz jumysshylaryna eńbekaqyny kóterdi. Degenmen áli de bolsa jalaqysy az adamdar bar. Elbasy Joldaýyndaǵy tapsyrmaǵa sáıkes, endi eń tómengi eńbekaqy 42 myń teńge bolady.

«Memleket basshysy Nursultan Nazarbaev Joldaýda 2019 jyldyń 1qańtarynan bastap eń tómengi jalaqyny 28 myń teńgeden 42 myń teńgege kóterýdi tapsyrdy. Aqtóbe oblysy boıynsha 38 myń adamnyń eńbekasy ósedi. Onyń 19 myńy bıýdjettik salada eńbek etedi. ıAǵnı, ár otbasy Joldaýdaǵy tapsyrmaǵa sáıkes kómekti sezinýi tıis»,- dedi oblys ákimi Berdibek Saparbaev.

Aıta keteıik, «Bıznestiń jol kartasy - 2020» baǵdarlamasy taǵy 5 jylǵa uzartyldy. Aqtóbe oblysy bıyl bul baǵdarlama boıynsha 5 mıllıard teńge alyp, ıgerip jatyr. Aldaǵy jyldary 2,5 mıllıard teńge alyp, shaǵyn jáne orta kásipti damytý josparǵa engizildi.

«Tarıf, baǵa qalypty bolýy úshin biz básekelestikti damytýymyz kerek. Bul halyqqa kerek is. Monopolıster iri kásiporyn salatyn kezde tarıfke baılanbaı ınvestıtsııa salýǵa ýáde beredi. Keıin tek tarıfti kóterý arqyly ınvestıtsııa salatynyn málimdeıdi. Bul durys emes. Keler jyly Aqtóbede tarıf kóterilmeýi tıis. Tek páter ıeleri kooperatıviniń qyzmetine qatysty baǵany qaıta qaraý kerek»,- dedi oblys ákimi.

Aqtóbe eksporttyń múmkindigin tıimdi paıdalana almaı otyr. Eýropa men Azııa arasyndaǵy hab qyzmetin durys atqarý úshin logıstıkany damytyp, jol boıyndaǵy bıznesti jandandyrý qajet.

«Bizde aýyl sharýashylyǵy baǵytynda transulttyq kompanııa áli joq. «AkTep» JShS-i et óńdeý kombınatyn úlkeıtýdi sheshpedi. Qarǵaly aýdanynda qus fabrıkasy salynbady, Mártókte 5 myń bas eshki baǵatyn sharýashylyq ta joba kúıinde qaldy. Aqtóbe - mal sharýashylyǵyn damytýǵa eń qolaıly óńir. Bizde 25 mıllıon gektar jaıylym bar. Ońtústik aýdandarda 10 aı mal dalaǵa jaıyla alady. Sonymen qatar, sýarmaly jerlerge qatysty qarqynymyz da mardymsyz. Jyl saıyn Úkimettiń, bankterdiń múmkindigin paıdalanyp, 8-10 myń gektar sýarmaly jerdi kóbeıtý kerek. Eki jyldan keıin óńirde kem degende 50 myń ga sýarmaly jer bolýy tıis. Sóıtip ony 100 myń ga jetkizý tapsyrmasy tur»,- dedi óńir basshysy.

Berdibek Saparbaev aktıvpen kezdesý kezinde aýdan, aýyl ákimderine naqty tapsyrmalar berip, ekonomıka, aýyl sharýashylyǵyndaǵy ósimdi baqylap, halyqqa Elbasy Joldaýyn túsindirýdi tapsyrdy.