Aqtóbede 32 úı apatty jaǵdaıda tur
Aqtóbe qalasyndaǵy apatty úıler ótken ǵasyrdyń 50-60 jyldary salynǵan. Olardyń bári 2-3 qabatty úıler.
- Qazirgi kezde «Stroıstandart» JShS-i 5 turǵyn úıdiń adamdaryna arnap úı salý jumysyn bastady. Sonymen birge «Hıba-Naz» JShS-i bir apatty úıdi súrip, ornyna qaıta salady. Bıyl qala ákimdigi M.Tynyshpaev kóshesinde ornalasqan 8 páterli úıdi rekvızıtsııalaý tártibimen satyp alady. Osylaı 6 kóppáterli turǵyn úıdi baǵalaý tártibimen alamyz, - dedi Aqtóbe qalalyq turǵyn úı ınspektsııasynyń basshysy Aqnur Qazbaeva.
Aqtóbe qalasy Tileý batyr kóshesindegi №13 úıdiń turǵyndary demeýshini ózderi izdedi. 2020 jyly taýyp, eki arada kelisim jasaldy. Úıdi salyp berýge ýáde etken qurylys kompanııasy alǵashynda turǵyndardyń jaldamaly páter aqysynyń bir bóligin ótedi. Sol kezde pandemııa bastalyp, qurylys kompanııasy da ýádesinde tura almady. Eki aralyqta «dalada qalǵan» aqtóbelikter tórt jyl boıy ákimdikke aıtyp, demeýshi taýyp aldy.
- Biz 35 otbasymyz. Aramyzda kópbalaly analar, áleýmettik jaǵynan az qamtylǵan otbasy, múgedekter de bar. Alǵashynda merdigerge senip, birimiz týysymyzdyń úıin panalap, birimiz páter jaldap kettik. Birinshi kelisim boıynsha salynbaıtyn bolǵan soń ákimderge usynys jasadyq. Osylaısha 4 jyldan astam ýaqyt ótti. Bıyl ǵana demeýshi tabylyp, kezdesý ótti. Men osy úıdiń turǵyndaryna bankten esepshot ashyp, qosymsha aqsha jınaýǵa usynys aıttym. Bári de qazir qarjy jınap jatyr, - dedi Turǵyn úı-qurylys kooperatıviniń tóraǵasy Saǵynbaı Qýanyshov.
Aıta keteıik, kelisim boıynsha qurylys kompanııasy 1-3 bólmeli páterdi tegin beredi. Turǵyndar úshin eski úıdegi ár sharshy metri saqtalady. Eger aýdany úlken páter alǵysy kelse, qosymsha aqy tólep, kelisimshartqa qol qoıady.
Buǵan deıin habarlaǵanymyzdaı, Aqtóbe qalasynda 36 apatty úı boldy. Qurylys kompanııalary olardyń ornyna jańasyn salý usynysyna qyzyqpaı otyr.