Aqtóbede 17 jastaǵy bozbalany ıt qaýyp aldy

<p>AQTÓBE. KAZINFORM &ndash; Aqtóbe qalasynda 17 jastaǵy bozbalany ıt qapty. Qazirgi kezde ıtten patologııalyq materıal alyndy.</p>

Oqıǵa 15 jeltoqsannan 16-na qaraǵan túni boldy. Aǵaly-inili aqtóbelik ıtti serýendetýge shyǵady. Sol kezde olarǵa ózge ıt qarsy júgirip, shabýyl jasaǵan. Óz ıtin arashalap qalmaq bolǵan aqtóbeliktiń biri qashyp qutylsa, ekinshisi kólik ishine kiredi.

- Ýchaskelik polıtsııa qyzmetkeri Aqtóbe qalasynyń veterınarııalyq stantsııasyna habar berdi. Habarlamada alabaı tuqymdas ıttiń 2004 jáne 2007 jyly týǵan eki azamatqa shabýyl jasaǵany týraly aıtylǵan. Ustaý qyzmeti dereý oqıǵa ornyna baryp, «Janýarlarǵa jaýapkershilikpen qaraý týraly» Zańyna sáıkes buralqy ıtti jansyzdandyrdy. Búgingi tańda patologııalyq materıal alyndy. Qutyrma aýrýy bar nemese joq ekeni anyqtalady. Qazirgi kezeńde bul aýdan Aqtóbe qalasynyń memlekettik veterınarııalyq stantsııasynyń aýlaý qyzmetiniń baqylaýyna alyndy, - dep habarlady Aqtóbe oblystyq veterınarııa basqarmasy.

Aqtóbe oblystyq Densaýlyq saqtaý basqarmasy baspasóz qyzmetiniń habarlaýynsha, zardap shekken aqtóbelik emhanadan ambýlatorlyq em alyp júr. 17 jastaǵy bozbalanyń qoly jaralanǵan. Ol qutyrma aýrýyna qarsy vaktsına qabyldady.

Buǵan deıin Májilis depýtaty Erbolat Satybaldın qańǵybas ıtterdiń taǵdyryna qatysty birneshe usynys baryn aıtty.