Aqtóbede 17 jastaǵy bozbala sýǵa batyp ketti

<p>AQTÓBE. KAZINFORM — Aqtóbe qalasyndaǵy Qarǵaly ózenine 17 jastaǵy jigit batyp ketti. Qutqarýshylar denesin 1,5 metr tereńdikten alyp shyqty.</p>

Oqıǵa búgin keshkilik Aqtóbe qalasyndaǵy Krasnaıa polıana baý-baqsha ujymynda boldy. 17 jastaǵy aqtóbelik tyıym salynǵan aýmaqta sýǵa túsip, jaǵaǵa shyqpaı qalǵan.

— Qarǵaly ózenine batyp ketken jigitti Aqtóbe oblystyq TJD jedel qutqarý jasaǵynyń súńgýirleri jaǵadan 10 metr, tereńdigi 1,5 metr bolatyn jerden tapty. Bıyl sýǵa túsý maýsymy bastalǵaly beri eki jazataıym oqıǵa boldy. Eki jaǵdaı da tyıym salynǵan jerlerde tirkeldi, — dedi Aqtóbe qalasy Almaty aýdany TJB bastyǵy Aslan Arzymbetov.

Eske salsaq, bıyl 30 mamyr kúni Aqtóbe qalasynda 20 jastaǵy jigit kóz jumǵan edi. Ol da Qarǵaly ózenine shomylǵan. 

Jalpy oblys boıynsha sýǵa túsýge tyıym salynǵan 200-den astam oryn bar.

Onda 300-ge jýyq arnaıy belgi ornatyldy. 

Eske salsaq, byltyr oblys aýmaǵynda 11 adam sýǵa ketip kóz jumdy. Onyń toǵyzy — bala.