Aqtóbede 14 medıtsına nysanyna kúrdeli jóndeý júrgizilip jatyr
Aqtóbe oblysynda qalamen qatar aýdan, aýyldarda tozyǵy jetken aýrýhana, ambýlatorııalar jóndelip jatyr. Olardyń arasynda «100 mektep — 100 aýrýhana» baǵdarlamasy aıasynda boı kótergen emdeý orny bar.
— Aqtóbe qalasyndaǵy № 1 emhananyń jylý júıesi qalpyna keltiriledi. Memlekettik baǵdarlamasy aıasynda salynǵan emdeý ornyndaǵy kúrdeli jóndeý jumysy qyrkúıekte aıaqtalady. Sonymen birge «100 mektep — 100 aýrýhana» baǵdarlamasy aıasynda salynǵan Aqtóbe medıtsına ortalyǵynyń jylý júıesin jańartýǵa 168 mln teńge bólindi. Jumystar jylytý maýsymy bastalǵanǵa deıin aıaqtalýy tıis, — dedi Aqtóbe oblystyq Densaýlyq saqtaý basqarmasy basshysynyń orynbasary Muratjan Qajǵalıev.
Al ótken ǵasyrda gostıpal qyzmetin atqarǵan № 2 Aqtóbe qalalyq emhanasynda kúrdeli jóndeý jumysy byltyr bastaldy. Munda da ǵımarattyń tozyǵy jetip, qabyrǵasynan ózgesin túgel aýystyrýǵa sheshim qabyldandy.
— Áıteke bı aýdandyq aýrýhanasynda shatyr jabylady. Sebebi tóbeden sý aǵyp turǵan. Osy aýdandaǵy Áıke jáne Tereńsaı aýyldaryndaǵy dárigerlik ambýlatorııa jóndelip jatyr. Tamyz aıynyń sońynda úsheýinde de jumys aıaqtalady. Yrǵyz aýdany Qyzyljar aýylyndaǵy ambýlatorııada kúrdeli jóndeý jasalady. Alǵa aýdanynda byltyr negizgi ǵımaratta jóndeý júrgizildi. Bıyl tamaqtandyrý bólimshesi jańartylyp jatyr. Alǵa aýdandyq aýrýhananyń qosalqy bólimsheleri de qalpyna keltiriledi. Medıtsınalyq kolledjge de kúreli jóndeý jumysy júrgizilip jatyr. Biz eshqaısysyn bólip-jarmaı, teń qylyp bólip beremiz. Kelesi jyly 20-dan astam ǵımaratty kúrdeli jóndeýden ótkizemiz. Olardyń qatarynda Aqtóbe medıtsına ortalyǵy, Aqtóbe qalalyq balalar aýrýhanasy, Aqtóbe oblystyq balalar aýrýhanasy, oblystyq ftızıopýlmonologııa ortalyǵy men Aqtóbe oblystyq klınıkalyq aýrýhanasy bar, - dedi Muratjan Qajǵalıev.
Onyń aıtýynsha, jumysty mindetine alyp, der kezinde tapsyrmaǵan merdigerler de bar. Máselen byltyr Oıyl aýdandyq aýrýhanasyna kúrdeli jóndeý júrgizilip, arty sot protsesine ulasyp ketti. Qazir eki tarapqa da tıimsiz sheshim shyqqan.
— Kúrdeli jóndeýdi mindetine alǵan merdigerdiń biliktiligi, jaýapkershiligi joq shyǵar bálkim? Oıyl aýdandyq aýrýhanasynda byltyr bastalǵan kúrdeli jóndeý jumysy áli aıaqtalmaı tur. Merdigermen arada sot ótti. Sot sheshimi bizge de, olarǵa da tıimsiz. Igerilmegen qarjy kólemi 53 mln teńge bolyp tur. Munda aýrýhana jumysy toqtaǵan joq. Tek syrtqy jumystary aıaqtalmaı qalǵan, — dedi Aqtóbe oblystyq Densaýlyq saqtaý basqarmasy basshysynyń orynbasary Muratjan Qajǵalıev.