Aqtóbede 138 sábıge baby-boks syıǵa berildi

AQTÓBE. QazAqparat - Aqtóbe oblysynda dúnıege kelgen 138 sábıge Táýelsizdiktiń 30 jyldyq mereıtoıyna oraı baby-boks syıǵa berildi, dep habarlaıdy QazAqparat tilshisi.

«Súıinshi» syılyǵy Aqtóbege de jetti. Onda Prezıdent Qasym-Jomart Toqaevtyń tilegi jazylǵan ashyq hat, «Táýelsiz Qazaqstanǵa 30 jyl» monetasy jáne balanyń týý týraly kýáligi bar.

«Aınalaıyn, bóbek! Seniń týǵan kúniń elimizdiń eń basty merekesimen tuspa-tus keldi. Óziń dúnıe esigin ashqan kezde halqymyz qasterli Táýelsizdiginiń 30 jyldyǵyn atap ótip jatty. Saǵan baqytty ári uzaq ǵumyr tileımin!», - dep jazylǵan Prezıdenttiń quttyqtaýynda.
16 jáne 17 jeltoqsanda týǵan balalarǵa týý týraly kýálikti alý týraly ótinimderdi «Azamattarǵa arnalǵan úkimet» memlekettik korporatsııasynyń qyzmetkerleri qabyldap, Qazaqstan azamatynyń alǵashqy qujatyn resimdeý úshin AHAJ organdaryna joldady.
«Sábı ómirge kelgennen keıin olarǵa balanyń birinshi qujatyn proaktıvti túrde rásimdeý usynysymen sms keledi. Sondaı-aq, ótinishti portal nemese Halyqqa qyzmet kórsetý ortalyǵy arqyly berýge bolady. Bizdiń qyzmetkerler perzenthanalarǵa baryp, bosanǵan áıelderden tikeleı ótinish aldy. Aqtóbe oblysy boıynsha mereke kúnderi 138 sábı dúnıege keldi. Qyzmetkerler qujattardy odan ári jedel daıyndaý úshin AHAT-qa jiberdi», - deıdi «Azamattarǵa arnalǵan úkimet» memlekettik korporatsııasy Aqtóbe oblysy boıynsha fılıalynyń dırektory Dárimbet Baımbetov.
Aıta ketý kerek, «Súıinshi» syıqoraptaryn QR Tsıfrlyq damý, ınnovatsııalar jáne aeroǵarysh mınıstrligi «Azamattarǵa arnalǵan úkimetpen» birge jáne QR Ulttyq bank, Tsentrkredıt banki jáne «Qazposhta» AQ qatysýymen uıymdastyrdy.