Aqtóbede 12 myń ıt-mysyq aýlandy

<p>AQTÓBE. KAZINFORM &ndash; Aqtóbe oblysynda bıyl ıt-mysyqty aýlaý, kútip ustaý, zararsyzdandyrý jumystaryna 200 mln teńgeden astam qarjy bólindi. Búginde 12 myń ıt-mysyq aýlandy.</p>

QR «Janýarlarǵa jaýapkershilikpen qaraý týraly» zańǵa sáıkes bıyl da aýlaý, kútip ustaý, zararsyzdandyrý jáne jansyzdandyrý jumystary jalǵasyp jatyr.

«Turǵyndardan túsken aryz-shaǵym, Ahýal ortalyǵyna túsken habarlamaǵa mamandar baryp, aýlaý, jetkizý jumysyn atqarady. Adamǵa, malǵa, qusqa shabýyl jasaý derekteri boldy. Aýlanǵan soń zararsyzdandyryldy jáne jansyzdandyryldy. Aqtóbe qalasynda ıtti kútip-baǵý jeke kásipkerdiń ǵımaraty aýmaǵynda júrgiziledi. Búginde olardyń sanyn anyqtaý úshin «Tańba» aqparattyq júıesi de engiziledi. Qazirgi kezde 6500-ge jýyq ıt, 1337 mysyq tizimge alyndy. Olarǵa chıp salynyp, ıelerine qujaty berildi. Bul baǵyttaǵy jumys úshin 10 mln teńge jumsalady», - dedi Aqtóbe oblystyq Veterınarııa basqarmasy bóliminiń basshysy Shahıdolla Rahımov.

Aqtóbe oblystyq Sanıtarııalyq-epıdemıologııalyq baqylaý departamenti baspasóz qyzmetiniń habarlaýynsha, bıyl alǵashqy jartyjyldyqtan jan-janýar tistegen, silekeıimen zaqymdaǵan 933 adam tirkeldi. Onyń 654-i ıt, 223-i mysyqtan zardap shekti. Sonymen birge 24-i múıizdi iri qara, tórteýi jylqy, bireýi túlkiden zábir kórdi.