Aqtóbe jurtshylyǵy qoǵam qaıratkeri Amangeldi Aıtalymen qoshtasty
Aqtóbe jurtshylyǵy belgili qoǵam qaıratkeri, fılosofııa ǵylymdarynyń doktory, professor, QR áleýmettik ǵylym akademııasynyń akademıgi, QR Bilim berý isiniń Qurmetti qyzmetkeri, Aqtóbe qalasynyń qurmetti azamaty Amangeldi Ábdirahmanuly Aıtalyny sońǵy saparǵa shyǵaryp saldy.
Rásim ózi dáris bergen Q.Jubanov atyndaǵy Aqtóbe óńirlik ýnıversıtetinde ótti.
JOO baspasóz qyzmetiniń habarlaýynsha, qoshtasý rásimine oblys basshysy Eraly Toǵjanov qatysyp, Prezıdent Qasym-Jomart Toqaevtyń kóńil aıtý jedelhatyn oqyp berdi.
«Asa kórnekti ǵalym, qoǵam qaıratkeri, Qazaqstan Respýblıkasy Parlamenti Májilisiniń ІІ-shi jáne ІІІ-shaqyrylymdarynyń depýtaty Amangeldi Ábdirahmanuly Aıtalynyń dúnıeden ótýine baılanysty kóńil aıtamyn. Amangeldi Ábdirahmanuly uzaq jyldar boıy bilim jáne ǵylym salasynda jemisti jumys jasady. Sonyń ishinde Aqtóbe memlekettik pedagogıkalyq ınstıtýtynda joǵary bilikti mamandar daıarlaý isine mol eńbek sińirdi. Májilis depýtaty bolǵan kezinde otandyq zańnamany jetildirýge jáne parlamentarızmdi damytýǵa atsalysty. Qajyrly qyzmetimen elimizdiń órkendep damýyna óz úlesin qosyp, sońyna jarqyn iz qaldyrǵan Amangeldi Ábdirahmanulynyń esimi men beınesi umytylmaıdy. Marqumnyń ımany salamat, jany jánnatta bolsyn»,- delingen jedelhatta.
Sonymen qatar qaraly jıynǵa Mańǵystaý oblysynyń ákimi Nurlan Noǵaev, QR Parlamenti Májilisiniń depýtaty Amanǵalı Berdalın, kórnekti aqyn, jýrnalıst Hanbıbi Esenqaraqyzy, Astana memlekettik qyzmet haby basqarýshy komıtet tóraǵasy Álıhan Baımenov, ýnıversıtet rektory Laýra Qarabasova, taǵy basqa zııaly qaýym ókilderi, qoǵam qaıratkerleri, áriptesteri men jaqyndary qatysty.
Eske salsaq, qoǵam qaıratkeri 21 jeltoqsanda 83 jasynda ómirden ótken edi.