«Aqtóbe jastary» turǵyn úı baǵdarlamasynyń alǵashqy 40 úmitkeri anyqtaldy
«Aqtóbe jastary» turǵyn úı baǵdarlamasyna qujat byltyr jeltoqsan aıynda qabyldandy. Talap boıynsha eńbek ótili, bala sany eskerildi. Sonymen birge bir jyl ishinde Aqtóbede turaqty tirkeýde turýy shart. 18-35 jas aralyǵyndaǵy jastardy baspanamen qamtý úshin Aqtóbe oblysynyń ákimdigi men «Otbasy banki» 600 mln teńge kóleminde qarjy bóldi.
«Bıyl 9-13 qańtar aralyǵynda «Aqtóbe jastary» turǵyn úı baǵdarlamasyna ótinish berge úmitkerlerdiń qujattaryn irikteý jónindegi komıssııa otyrysy ótkizildi. Komıssııa quramyna qoǵamdyq keńes músheleri men máslıhat depýtattary, úkimettik emes uıymdar men jastar qozǵalystarynyń ókilderi, blogerler jáne «Otbasy bank» AQ qyzmetkerleri kirdi. Bes kúnge sozylǵan komıssııa otyrysynda qabyldanǵan 1039 qujattyń barlyǵy derlik qaraldy. Komıssııa otyrysy Instagram áleýmettik jelisindegi Jasaqtobe resmı akkaýntynda tikeleı ótkizilip, efır saqtaldy», - dep habarlady oblys ákiminiń baspasóz qyzmeti.
Aıta keteıik, úmitkerlerdiń jalpy upaıy sany birdeı bolǵan jaǵdaıda basymdyq bala sanyna, sodan keıin jınaǵyna berildi. Eńbek ótili úshinshi qatarda. Eger de jalpy upaıy teń úmitkerlerdiń bala sany birdeı bolsa, jarna kólemi esepteledi. Al bala sany men jarna kólemi birdeı bolsa, eńbek ótili merzimniń uzaqtyǵy (aıy, kúni, jyly) eskeriledi.
«Endi 40 úmitker 17-24 qańtar aralyǵynda tólem qabiletin rastaý úshin «Otbasy bank» AQ Aqtóbe oblystyq fılıalyna barady. Al 12 úmitker rezervte bolady. Eger bastapqy 40 úmitkerdiń keıbiri tólem qabiletin rastaı almasa, keıingilerdiń joly ashylady», - dep habarlady oblys ákiminiń baspasóz qyzmeti.