«Aqtóbe jastary» turǵyn úı baǵdarlamasyna qujat qabyldaý bastalady
Aqtóbe oblysy boıynsha jastardy turǵyn úımen qamtý úshin jańa baǵdarlama engizildi. Endi jas mamandarǵa 15 mln teńgege deıin nesıe beriledi.
Bul turǵyn úı nesıesin rásimdeý úshin alǵashqy jarna suralady.
«Bıyl qazan aıynda oblys ákimi óńirdegi jastarmen kezdesý ótkizip, onda turǵyn úı máselesi kóterildi. Eraly Toǵjanov Astana qalasynda ótken «Aktobe Investment-2022» VII Halyqaralyq ınvestıtsııalyq forýmy aıasynda «Aqtóbe jastary» baǵdarlamasyn júzege asyr úshin memorandýmǵa qol qoıdy. Oblys ákimdigi, «Otbasy bank» AQ AOF birlese otyryp jastardy turǵyn úımen qamtý úshin jańa baǵdarlama tujyrymdamasy ázirlendi. Bıyl 600 mln teńgeni bólindi. Onyń 300 mln teńgesin «Otbasy bank» AQ, qalǵan 300 mln teńgesi jergilkti bıýdjetten bólindi», - dedi oblystyq ishki saıasat basqarmasy bóliminiń basshysy Eleýsiz Nurǵalıev.
Talap boıynsha 18-35 jas aralyǵyndaǵy jastar baǵdarlamaǵa qatysa alady. Erli-zaıyptynyń bireýi ǵana úmitker retinde tirkeledi.
Ári sońǵy 1 jyl ishinde Aqtóbede turaqty tirkeýde turýy tıis.
Sonymen birge ótinish berý kezinde, onymen birge turatyn otbasy músheleriniń oblysta turaqty tirkeýde turýy mindetteledi ári jeke baspanasy bolmaýy tıis.
«Densaýlyq saqtaý, bilim, mádenıet, aýyl sharýashylyǵy, sport salalarymen qatar joǵary oqý oryndary men ǵylymı-zertteý ınstıtýttarynyń qyzmetkerleri, BAQ qyzmetkerleri men áleýmettik sala mamandary, kommýnaldyq kásiporyn qyzmetkerleri, azamattyq qorǵanys jáne tótenshe jaǵdaılar salasynyń mamandary, memlekettik qyzmetshiler, memlekettik mekemelerde jeke eńbek sharty boıynsha jumys istep júrgen adamdar qatysa alady. Jalpy qaryzdyń eń joǵary somasy - 15 mln teńge. Nesıe 23 jylǵa deıin beriledi. Paıyzdyq mólsherleme - 5%. Bastapqy jarna – 10%. Ótinishter 15 - 30 jeltoqsan aralyǵynda jazbasha nusqada Aqtóbe qalasy Áıteke bı kóshesi 39 mekenjaıynda ornalasqan Oblystyq jastar resýrstyq ortalyǵynda qabyldanady. Keıin ótinish 14 kún boıy qaralady. Joldamany alǵan ótinish berýshi 10 jumys kúni ishinde tólem qabiletin rastaý ótý úshin «Otbasy bank» Turǵyn úı qurylys jınaq banki» AQ-nyń kez kelgen qyzmet kórsetý ortalyǵyna júginýi qajet. Bank tekserýinen ótkennen keıin 30 kúntizbelik kún ishinde qatysýshy turǵyn úıdi tańdap, qujattardy «Otbasy bank» AQ-ǵa usynýǵa mindetti», - dedi Eleýsiz Nurǵalıev.